Ўзбекистондаги мактабларнинг тўртдан бирида сув йўқ. Мингдан зиёд мактаб ҳамон «буржуйка» печ орқали иситилади. Бу ҳақда 26 март куни Ўзбекистон ахборот ва оммавий коммуникациялар агентлигида иштирокида «Ўқитувчиларнинг жамиятдаги нуфузини ошириш билан боғлиқ муаммолар ва уларнинг ечимлари» мавзусидаги матбуот анжуманида маълум қилинди, деб хабар берди «Дарё» мухбири Севара Нишонова.
Халқ таълими вазири Шерзод Шерматовнинг маълум қилишича, мактаблардаги муаммоларни аниқлаш ва уларни бартараф қилиш мақсадида ҳозирда Ўзбекистондаги барча мактаблар хатловдан ўтказилмоқда.
«Ҳозирда бутун республикадаги мактаблар хатловдан ўтказилмоқда. Хатлов натижасида мактаблардаги муаммолар кўзга ташланди. Булар қандай муаммолар? Масалан, мактабларнинг жуда катта қисмида сув йўқ, оддий ичимлик суви йўқ. Биз инновация, замонавий техникалар ҳақида гапираётганимиз йўқ. Энг зарурий—ичимлик суви ҳақида гапиряпмиз. Президентимиз ҳам сўнгги икки йил давомида ҳудудларга тоза ичимлик суви олиб бориш ҳақида гапирмоқда. Биринчи аҳолини қийнайдиган муаммо шу сув. Сўнгги икки йил ичида ушбу муаммони ҳал қилиш учун самарали ишлар қилинди.
Кейинги масала қиш мавсумида мактабларни иситиш. Аксарият мактаблар қиш пайтида кўмир ёрдамида иситилади. Бу эса ўқувчиларнинг ис газидан заҳарланишига олиб келмоқда.
Навбатдаги масала мактаблар моддий-техника базасини яхшилаш. Шунча пайт давомида асосий эътибор лицей ва коллежларга бериб келинган. Кўп мактаблар таъмирталаб бўлиб қолган.
Ўзбекистондаги мактабларнинг тўртдан бирида сув йўқ. Мингдан зиёд мактаб ҳамон «буржуйка» печ орқали иситилади. Чегара ҳудудларда жойлашган мактабларда хавфсизлик нол даражада. Биз ҳали робототехника ёки космосга учиш ҳақида гапирмай қўя қолайлик, аввал мактаблардаги тоза сув ва иситиш муаммосини ҳал этиб олайлик», – дейди Шерзод Шерматов.
Изоҳ (0)