Канада Исроилнинг Голан тепалиги устидан назоратини тан олмайди, дея хабар беради «РБК».
«Халқаро қонунларга кўра, Канада Исроилнинг Голан тепалиги устидан доимий назоратини тан олмайди. Канаданинг узоқ муддатли позицияси ўзгаришсиз қолмоқда», — дейилади баёнотда.
Канада Ташқи ишлар вазирлиги таъкидлаганидек, халқаро ҳуқуқлар ҳудудларни куч билан қўшиб олиш ва чегарани бир томонлама ўзгартириш тўғрисидаги баёнотларни тақиқлайди. Шу билан бирга, Ташқи ишлар вазирлиги Канаданинг Исроилнинг дўсти эканини ва қўшни давлатлар билан тинчликда яшаш ҳуқуқини қўллаб-қувватлашини айтган.
25 март куни АҚШ президенти Дональд Трамп Голан тепалигини Исроилнинг бир қисми деб тан олиниши ҳақида фармон имзолаган. Шу муносабат билан Россия Ташқи ишлар вазирлиги ушбу ҳужжат БМТ Хавфсизлик Кенгашининг қарорларига зид эканини таъкидлаган, шунингдек, халқаро келишувни инкор этишини маълум қилган. Сурия Ташқи ишлар вазирлиги Трампнинг қарорини «очиқ тажовуз» деб баҳолаган.
1967 йилги олти кунлик урушдан олдин, 1800 квадрат километрлик Голан тепалиги Суриянинг бир қисми бўлган. Кейин Исроил уларнинг назоратини олиб, ҳудудларни ўз таркибига қўшган. БМТ Хавфсизлик Кенгашига кўра, бу ноқонуний аннексия бўлган.
Изоҳ (0)