Туркманистон чегарачилари томонидан бетараф ҳудудни тозалаш мақсадида ёқиб юборилган қамишзорларлар орасида яшаб келган ёввойи итлар Шовот туман ҳудудига ўтиб қаровсиз қолган уй ҳайвонларига ҳужум қилган. Бу ҳақда «Дарё»га Бош Прокуратура матбуот хизмати раҳбари Сурайё Раҳмонова маълум қилган.
Март ойи бошида ёввойи итлар Хоразм вилояти, Шовот туманида жойлашган, «Уста ҳунарманд» маҳалласида яшовчи фуқаро Д.Қурбоновнинг бир бош эчкисига, фуқаро А.Каримовнинг бир бош қўйига, фуқаро М.Қурязовнинг бир бош қўйига ҳужум қилиб, ҳайвонларни нобуд қилган.
Маълумотларга кўра, фуқаро Р.Собиров томонидан қўлбола ясалган темир қопқонга 16 март тунги соат 03:00 ларда ёввойи итлардан биттаси қопқонга тушиб ўлган. Қопқонга туширилиб ўлдирилган ёввойи итнинг ранги қорамтир кулранг.
Р.Собиров ушбу ёввойи итни қопқонга туширган вақтида улар иккита бўлган, ҳайвонларнинг иккинчиси оқ рангда бўлиб, қочиб кетганлигини билдирган.
Ҳозирда ҳолат юзасидан туман ИИБ томонидан суриштирув ҳаракатлари олиб борилмоқда. Шунингдек, вилоят овчилар ва балиқчилар жамият томонидан мазкур ёввойи итларни овлаш чоралари кўрилмоқда.
Бундан аввал, ўтган ҳафтада Хоразм вилоятининг Шовот тумани Беруний қишлоғидаги «Уста-Ҳунарманд» маҳалласида номаълум йиртқич ҳайвон йигирмата қўйни ўлдиргани ҳақида хабар бергандик.
Изоҳ (0)