Самарқанд шаҳрида ҳозирги кунда қидирувдаги шахслар сони 332 нафарни ташкил қилади. Уларнинг 82 нафарини аёллар, 250 нафарини эркаклар ташкил қилади. Қидирувдаги шахсларнинг 4 нафарига нисбатан тилхат эҳтиёт чораси қўлланилиб, 228 нафарига қамоқ эҳтиёт чораси қўлланилган. Бу ҳақда қидирувдаги шахсларни яшаш манзилига қайтариш бўйича уларнинг оила аъзолари ва яқин қариндошлари билан ўтказилган учрашувда маълумот бериб ўтилди. Бу ҳақда Самарқанд вилояти ИИБ «Дарё»га маълум қилди.
Қидирувдаги шахсларнинг оила аъзолари ва яқин қариндошлари билан навбатдаги учрашувда Самарқанд шаҳар ҳокими Фурқат Раҳимов, Самарқанд вилояти прокурорининг биринчи ўринбосари Сирожиддин Эшқувватов, Самарқанд вилояти жиноят ишлари бўйича суд раисининг ўринбосари Ўткир Мамадалиев ҳамда Самарқанд вилояти ИИБ бошлиғининг биринчи ўринбосари Фарҳод Ҳасановлар иштирок этган.
Вилоят ИИБ матбуот хизматининг маълум қилишича, қидирувда бўлган шахсларнинг 40 нафарини диний экстремизм оқими аъзолари ташкил қилади. 8 нафарини чет эл фуқаролари, 12 нафарини чет эл фуқаролигини олганлар ва 5 нафарини бошқа вилоятлардан келиб жиноят содир этиб қидирувда бўлган шахслар ташкил қилади.
Ҳозирги кунда 14 нафар қидирувдаги шахс чет давлатларига экстрадиция қилишлик учун вақтинча жазо муддатини ўтамоқда. Мазкур 14 нафар қидирувдаги шахснинг олиб келиш тартиби 1993 йил 22 январь кунидаги давлатлараро Минск конвенциясига асосан олти ойдан бир йил муддат ичида яшаш манзилига олиб келинади.
Маълумот учун, қидирувда бўлган шахсларни манзилига қайтариш уларнинг оила аъзолари ва яқин қариндошлари билан ўтказилган йиғилишдан сўнг 51 нафар қидирувдаги шахс ўз ихтиёри билан қайтиб келган. Қидирувдаги шахслар ўз ихтиёри билан ҳуқуқни муҳофаза қилувчи органларига мурожаат қилганликлари инобатга олиниб, уларга нисбатан муқаддам қўлланилган «қамоқ» тарзидаги эҳтиёт чоралари ўзгартирилиб, қонунда белгиланган енгиллаштирувчи ҳолатлар қўлланилган.
Изоҳ (0)