Фарғона вилоятидаги таълим масканларида коррупцияни олдини олиш ва унга қарши курашиш борасида аниқ чора-тадбирлар белгилаб олинган. Шундай бўлса-да, таълим соҳасида ҳам нохуш ҳолатлар кузатилмоқда. Бу ҳақда ЎзА хабар берди.
Хусусан, жиноят ишлари бўйича Олтиариқ суди томонидан ўтган йилда умумтаълим мактабларининг 2 нафар раҳбарига қўзғатилган жиноят иши кўриб чиқилиб, уларга тегишли жазо белгиланди.
Тумандаги 5-умумтаълим мактаби директори Г.Ғ. фуқаро Ш.А. га Фарғона давлат университетида очилган бошланғич таълим йўналишининг махсус сиртқи бўлимига ҳужжатларни топшириш учун тавсифнома ёзиб бериш эвазига таъмагирлик йўли билан учун 300 минг сўм пул талаб қилган. Ҳуқуқни муҳофаза қилувчи идоралар томонидан ўтказилган тадбирда мактаб директори мазкур пулларни олаётган вақтда далилий ашё билан ушланган. Суд ҳукми билан унга қонун доирасида жазо тайинланди.
Шунингдек, 29-умумтаълим мактаб директори кутубхоначи вазифасига ишга қабул қилиш учун 100 доллар пора сўраган.
Жиноят ишлари бўйича Олтиариқ туман суди томонидан 34-умумтаълим мактабида тумандаги мактаб директорлари ҳамда ўқитувчилар иштирокида очиқ мулоқот ўтказилиб, коррупцияга қарши кураш, таълим соҳасида юқоридаги каби таъмагирлик ҳолатларини олдини олиш масалалари муҳокама этилди.
Изоҳ (0)