Украинадаги уруш 2026 йилда ҳам давом этса, мамлакат учун ҳарбий эҳтиёжларга камида 120 миллиард доллар керак бўлади. Бу ҳақда Украина мудофаа вазири Денис Шмигал маълум қилди.
Унинг сўзларига кўра, Украина Европа Иттифоқи ва НАТО давлатлари билан музокаралар олиб бормоқда, чунки бу маблағнинг 60 миллиард долларини ҳамкорлардан олиш режалаштирилган. Шмигал Украина “ўзининг ноёб жанговар тажрибаси, технологиялари ва инновацияларини” иттифоқчи давлатлар билан бўлишишга тайёр эканини айтган. Киев қўшма корхоналар ташкил этиш, лицензиялар бериш ва ҳамкор мамлакатларда ишлаб чиқариш қувватларини йўлга қўйишни таклиф қилмоқда.
Уруш даврида бундай маҳсулотлар Украина армияси эҳтиёжлари учун ишлатилади ва узоқ муддатли истиқболда ҳамкорларимизнинг мавқеини мустаҳкамлайди, деган Шмигал.
У ҳарбий саноатни ривожлантириш, айниқса ФПВ ва узоқ масофали дронлар, тутиб олиш тизимларини ишлаб чиқаришга қўшимча сармоялар зарурлигини таъкидлаган.
Украина собиқ мудофаа вазири Рустем Умеров эса мамлакат узоқ масофали дронлар ёрдамида Россияга зарбалар сонини кескин оширишга тайёрланаётганини айтганди. У бунга “ўн минглаб” дронлар жалб этилишини билдирган. Уларнинг нишони Россиянинг ҳарбий объектлари бўлади.
Умеровнинг таъкидлашича, 2025 йилда армия Украина корхоналари томонидан ишлаб чиқариладиган 4 миллиондан ортиқ дронларни олади. Европа Иттифоқи кенг кўламли уруш бошланганидан бери Украинага деярли 160 миллиард евро, жумладан, Украина Facility дастури доирасида 50 миллиард евро ажратган. 2025 йилда Европа Иттифоқи давлатлари Киевга 23 миллиард евролик қўшимча ҳарбий ёрдам ваъда қилган. Шунингдек, музлатилган Россия активлари ҳисобидан 30 миллиард евролик кредитлар тақдим этган.
Украинага бошқа давлатлар ҳам ҳарбий ва молиявий ёрдам кўрсатмоқда. Хусусан, Австралия 160 миллион долларлик ёрдам пакети доирасида Украинага 49 та М1А1 Абрамс танкининг асосий қисмини етказиб берган.
Изоҳ (0)