15 март, жума куни вафот этган Ўзбекистон Республикаси Олий Мажлиси Сенати аъзоси, давлат ва жамоат арбоби Мираброр Усмонов хонадонига Президент Шавкат Мирзиёев ташриф буюриб, марҳумнинг оила аъзоларига ҳамдардлик билдирди. Бу ҳақда Президент матбуот хизмати хабар беради.
Президент Шавкат Мирзиёев марҳум хонадонига ташриф буюриб, рафиқаси ва фарзандларига ҳамдардлик билдирди. Қуръон тиловат этилиб, марҳумнинг ҳақига дуо қилинди.
Мираброр Усмонов мустақиллигимизнинг оғир-енгил кунларини тортган, халқимизга, Ватанимизга катта хизматлар қилган улуғ инсон эди. Одамларга қўлидан келганча яхшилик қиларди. Оиласига, юртига, давлатга садоқатли эди. Кейинги пайтларда соғлиги яхши бўлмаса ҳам Сенатнинг ҳамма мажлисларида қатнашишга ҳаракат қилди, фойдам тегсин дерди.Шавкат Мирзиёев, Ўзбекистон Президенти
Маълумот учун, Мираброр Зуфарович Усмонов 1947 йилда Тошкент шаҳрида туғилган. Кўп йиллар иқтисодиёт, савдо ва хизмат кўрсатиш соҳаларида турли лавозимларда самарали фаолият олиб борган, 1994—2005 йилларда эса Ўзбекистон Республикаси Бош вазири ўринбосари сифатида истеъмол моллари ишлаб чиқариш ва савдо тармоқларига раҳбарлик қилган.
Усмонов Ўзбекистон Республикаси Олий Мажлиси Сенатидаги кўп йиллик фаолияти давомида билими, катта ҳаётий тажрибаси билан қонунлар ишлаб чиқилишида фаол иштирок этди. Миллий олимпия қўмитаси президенти сифатида Ўзбекистонда спортни ривожлантиришга катта ҳисса қўшди.
Мираброр Усмоновнинг кўп йиллик самарали меҳнати ҳукумат томонидан муносиб тақдирланиб, «Меҳнат шуҳрати», «Фидокорона хизматлари учун», «Эл-юрт ҳурмати» ва «Дўстлик» орденлари ҳамда «Ўзбекистон Республикасида хизмат кўрсатган ёшлар мураббийи» фахрий унвони билан мукофотланган эди.
Изоҳ (0)