“Барселона” сафига ўтиши кутилаётган англиялик ҳужумчи Маркус Рэшфорд жамоада асосий таркиб учун бразилиялик футболчи Рафинья Диас билан рақобатлашади. Бу ҳақда Carrusel Deportivo нашри хабар бермоқда.
Манбага кўра, клуб устози Ҳанси-Дитер Флик ҳужум чизиғининг чап қанотида ҳали ҳам Рафиньяни асосий футболчи сифатида кўрмоқда. Шу сабабли, Рэшфорд дастлаб жамоада ўйинни захирадан бошлаши кутилмоқда.
Ўтган мавсумда Рафинья “Барселона” сафида барқарор ўйин кўрсатди ва жамоадаги муҳим фигуралардан бирига айланди. 28 ёшли вингер жами 57 учрашувда майдонга тушиб, 34 та гол ва 25 та голли узатма муаллифига айланди.
Эслатиб ўтамиз, Рэшфорд “Манчестер Юнайтед”дан 2025/26 йилги мавсум якунигача ижарага олинган. Битимда футболчини тўлиқ сотиб олиш имконияти ҳам мавжуд бўлиб, “Барселона” бу бандни 30 миллион евро эвазига фаоллаштириши мумкин. Трансфер расман 23 июль, чоршанба куни эълон қилиниши кутилмоқда.
Изоҳ (0)