Shavkat Mirziyoyev Navoiy viloyatiga tashrifi doirasida “Navoiyazot” aksiyadorlik jamiyatiga ham bordi. Bu haqda Prezident matbuot xizmati ma’lum qildi.
Shavkat Mirziyoyev 2018-yilda ham mazkur korxonada bo‘lib, bu yerda amalga oshirilayotgan uchta yirik investitsion loyiha bilan tanishgan, uni o‘z vaqtida va sifatli yakunlash bo‘yicha mutasaddilarga topshiriqlar bergan edi.
Jamiyat hududida uchta yirik investitsion loyiha — polivinilxlorid (PVX), kaustik soda va metanol ishlab chiqarish, ammiak va karbamid ishlab chiqarish hamda azot kislotasi ishlab chiqarish korxonalari qurilishi qizg‘in davom etmoqda. Bunyod etilayotgan ushbu korxonalarga zamonaviy, tejamkor texnologik uskunalar o‘rnatiladi.
Prezident ushbu yangi obyektlardagi bunyodkorlik ishlari bilan tanishdi, quruvchilar, xorijlik investorlar bilan muloqot qildi. Bu yerda ishlaydigan kadrlarni tayyorlash tizimini yanada takomillashtirish lozimligini qayd etdi.
Davlat rahbari zamonaviy energiya tejamkor texnologiyalar bilan jihozlanadigan mazkur majmualar mahsulot ishlab chiqarish hajmini oshirish, tannarxini tushirish, raqobatbardoshligini ta’minlashda muhim omil bo‘lishini ta’kidladi.
Shu yerda Navoiy viloyatida O‘zbekistonning AQSh, Birlashgan Arab Amirliklari va Ukrainadagi elchixonalari ko‘magida amalga oshiriladigan investitsiya loyihalari taqdimoti o‘tkazildi. Prezidentga viloyatda sanoatni rivojlantirish, ishlab chiqarishni mahalliylashtirish va boshqa tarmoqlarda bajarilishi ko‘zda tutilgan loyihalar haqida ham ma’lumot berildi.
Izoh (0)