2019 йилнинг 5 март куни Жиноят ишлари бўйича Самарқанд вилоят суди судьяси Ўткир Мамадалиев раислигида бўлиб ўтган суд мажлисида Самарқанддаги 64-ихтисослаштирилган мактаб-интернатининг собиқ директори Шуҳрат Садинов, тарбиячилар Шерзод Очилов ва Зухриддин Салимов суд залидан озодликка чиқарилгани ҳақида хабар берган эдик. Апелляция судининг якунида, биринчи инстанция суди ҳукмига кўра 8 йилга озодликдан маҳрум қилинган Садиновнинг жазоси енгиллаштирилиб, 5 йил муддатга озодликни чеклаш жазоси тайинланди.
«Дарё» мухбири Фарҳод Норбўатев Самарқанддаги мактаб-интернатдаги даҳшатлар қанчалик ҳақиқатга яқин эканлиги юзасидан журналистик суриштирув олиб бормоқда.
Суд ажримига кўра Самарқанддаги 64-махсус мактаб-интернатига 2018 йилнинг 25 июнь куни келган Суҳроб Омонов Шуҳрат Садинов билан боғлиқ ҳолат аслида уюштирилганлигини айтиб ўтди.
14 ёшли Суҳроб Омоновнинг сўзларига кўра, 2018 йилнинг июль ойида мактаб-интернати билан боғлиқ болаларни қийнаш, ўзини ўзи ўлдириш даражасига етказиш каби ҳолатларни ОАВда тарқалиши мактаб-интернати тарбиячиси Сайёра Мансурованинг олдиндан белгиланган режаси ва буюртмаси асосида амалга оширилган.
– Интернатга келганимдан сўнг Сайёра Мансурова мени олдига чақириб, қачон келганлигимни, қўлимдан қандай иш келишини сўради, — дейди Суҳроб Омонов. – Мен бу ерга келганимга 2–3 кун бўлганлигини айтдим. Сайёра опа ўша вақтда мактаб-интернат ҳовлисидаги тошларни тозалаётган гуруҳни видеога олиб беришимни сўради. Мен эса у киши берган телефонга ҳолатларни видеога олиб бердим.
Суҳроб Омоновнинг айтишича, мактаб-интернат тарбиячиси Сайёра Мансурова унга ўзини касалликка солиб, йиқилиб, ходимларни қўрқитишини буюрган. Топшириққа кўра Омонов оғзидан кўпик чиқариб, ўзини тутқаноққа тушгандай кўрсатган.
– Охир-оқибат тарбиячилар «шантаж» қилаётганлигимни билиб қолишди. Алдамасдан тўғрисини айт дейишди. Сўнг мени шифокорга олиб борди. Эрталаб туриб мени олиб борган тарбиячимга ҳаммасини айтиб бердим, – дейди Суҳроб Омонов.
Олиб борилган журналистик суриштирув жараёнида маълум бўлишича, ўзини тутқаноқ ҳолатига солган Суҳроб Омоновни шифокорлар турли хил дорилар билан ўзига келтиришган. Аслида соппа-соғ бўлган Омонов кучли уколларнинг оғриғига чидай олмай охири ҳақиқатни айтишга мажбур бўлган. Суҳроб Омонов махсус мактаб-интернатига комиссия келганлигини Сайёра Мансуровага айтиб, қилган ишидан қўрқаётганлигини билдирган. Сайёра Мансурова уларга эътибор бермай кузатиб юришини топширган.
– Эртаси куни ҳамма жойни ички ишлар ходимлари босиб кетди. Мен Сайёра опага бегона одамлар келганлигини, қўйилган камераларни йиғиштириб олайми деб айтдим, — дейди Суҳроб Омонов. – Сайёра Мансурованинг топшириғига кўра мактаб-интернатининг кутубхонаси, директор хонаси, Жасур исмли тарбиячининг хонаси, болалар телевизор кўрадиган хона, ошхонадаги гулларнинг орқасига кузатув камераси (жучок) қўйиб чиққан эдим. Комиссия келганидан сўнг видеокамераларни Сайёра Мансурованинг ўзи йиғиштириб олишини айтди.
Маълум бўлишича, Мансурова ўз режаларини амалга ошириш учун Суҳроб Омоновга муддатидан аввал уйига қўйиб юборишни ваъда берган. Аввалига мактаб интернатидан кетишига ишонтирган Мансурова ҳаттоки Омоновга таҳдид ҳам қилган.
– Сен мени топшириқларимни бажарсанг, мен сени айтганингни қиламан, Қилмасанг уйдагиларингни ўлдириб юбораман деб таҳдид қилди. Мен қўрқиб хўп дедим, — дейди Суҳроб Омонов. – Кейинчалик Имо орқали мени ким биландир гаплаштириб қўрқитди. Соқолли, қорароқдан келган одам шу опангни айтганини қилмасанг уйдагиларингни отиб ташлайман деди. Мен қўрққанимдан Сайёра Мансурова берган топшириқларни бажараман деб айтдим. Мен у одамни аввал кўрмагандим. Фақат Имо орқали кўрганман.
Суҳроб Омоновнинг айтишича, Сайёра Мансурова директорни йўқотиб, ўзи директор бўлишни режалаштирган. Қолаверса, 2017 йилда қандайдир масала учун Шуҳрат Садинов билан келишолмай қолганлиги учун аламини олиш мақсадида шу ишларни қилган. Бунинг эвазига эса Омонов муддатидан аввал уйига кетиши лозим бўлган.
– Мен Сайёра Мансурова берган барча топшириқларини бажардим. Аммо у киши менга берган ваъдасининг устидан чиқмади. Мени уйимга юбормади. Аксинча, мен сенга ҳеч қандай топшириқ берганим йўқ деб ўзини олиб қочди, — дейди Суҳроб Омонов. – Уйимга жўнатмаяпсизку деб айтганимда, тўхта, ҳали вақти келади. Вақти келганда мен сени жўнатаман деб айтди. Охири тез ёрдам орқали шифохонага олиб кетганда тарбиячимга бўлган воқеаларни айтиб бердим.
Суҳроб Омоновнинг айтишича, у Сайёра Мансуровадан Шуҳрат Садинов ишдан кетганидан сўнг уйига жўнатишини сўраган. Аммо Мансурова мен сенга бу ишни қилдирганим ҳам йўқ, ҳеч қандай ваъда ҳам берганим йўқ деб, айтган гапини тан олмаган. Сени далил исботинг йўқ, ҳеч нима қила олмайсан деган.
Суҳроб Омонов биринчи инстанция судида бўлиб ўтган воқеаларни тўғрисини айтганлиги учун ҳатто тазйиққа ҳам учраган. Бу борада биринчи инстанция суди ҳайъатига ҳам айтган. Аммо унинг мурожаати эътибордан четда қолдирилган.
– Биринчи инстанция судининг охирги кунидан сўнг Алишер Абдуллаев деган мактаб тарбияланувчиси мени чеккага чиқариб урди. Нега ураяпсан десам, сен аралашма, бўлган воқеани билмайсан деб менга пўписа қилди, — дейди Суҳроб Омонов. – Сен «спалний»га кирсанг гуруҳ билан «напарни» қиламан деди. Урганидан сўнг йиғлаб ўтирганимда мени судга олиб борган тарбиячи нимага йиғлаяпсан деди. Алишер Абдуллаев урганлигини айтдим.
Эслатиб ўтамиз, Шуҳрат Садиновнинг адвокати Амриддин Содиқов ҳам тарбиячи Сайёра Мансурова 2018 йил июль ойида бир неча собиқ тарбиячилар, айрим тарбияланувчилар ва уларнинг ота-оналари билан келишган ҳолда Шуҳрат Садиновга нисбатан ғараз мақсадда, туҳмат ва сохта далиллар билан республика ҳуқуқ-тартибот идораларига шикоят хати уюштирганини маълум қилганди.
«Дарё» таҳририяти «Садинов иши» бўйича журналистик суриштирувни давом эттирмоқда. Тез орада апеллация судида Шуҳрат Садиновга қарши кўрсатма берган Бобур Салимовнинг иқрори ҳамда Бухоро шаҳридаги истироҳат боғида ўз жонига қасд қилмоқчи бўлган, 64-махсус мактаб-интернатининг собиқ ўқувчиси Беҳруз Жумақулов билан бўлиб ўтган суҳбатни эътиборингизга ҳавола этамиз.
Изоҳ (0)