Тез орада Uzcard карточкалари орқали бемалол валюта ечиб олиш имконияти пайдо бўлади. Бу ҳақда Ягона умумреспублика процессинг маркази бош директори Аҳрор Маҳмудов ЎзАга маълум қилди.
Аҳрор Маҳмудов сўзларига кўра, айни вақтда Ягона умумреспублика процессинг маркази Ўзбекистонда фаолият олиб бораётган 29 та банк ва 40 дан ортиқ тўлов тизимларига (тўлов агрегаторлари) процессинг хизматларини кўрсатиб келмоқда.
«Мижозлар учун бу борадаги сўнгги янгиликлардан бири сифатида VISA карточкаларининг текинга очилаётганини айтиш мумкин. Бунинг сабаби, ҳозирда валютани лебераллаштириш борасида юртимизда «Йўл харита»си ишлаб чиқилган. Ҳеч кимга сир эмас, бир-икки йил олдин конвертация муаммоси катта эди. Қора бозор ва тижорат банклари ўртасидаги нархда катта тафовут бор эди. Энди у ҳолатга чек қўйилди ва барча йўллар очилди», — дейди Ягона умумреспублика процессинг маркази бош директори.
Унинг сўзларига кўра, энди ҳар бир фуқаро валютани чегарасиз миқдорда харид қилиши мумкин. Бу банклар учун ортиқча харажат бўлса-да, карточкаларни текинга бериш амалиётини банклар қўлламоқда. Лекин, яқинда конвертация бунга эҳтиёж қолмайди. Чунки, Uzcard карточкалари орқали бемалол валюта ечиб олиш имконияти пайдо бўлади.
«Айни вақтда хитойлик ҳамкорларимиз билан ишлаб чиқилган карточкаларни амалиётда қўллашни бошладик. У иккита логотипга эга бўлиб, Ўзбекистон ҳудудида сўмга ишлайди. Хорижга чиқилса, сўмлар автоматик равишда конверсия бўлиб, сиз турган давлатнинг пул бирлигига айланади», — дейди Маҳмудов.
Таъкидланишича, ҳозирда Ўзбекистондаги 12 тижорат банки тизимга аъзо бўлган.
Изоҳ (0)