Олий суд Қашқадарёда ҳам сайёр қабул ўтказди. Бироқ Олий суд раисисиз ўтган қабул шикоятчиларни қониқтирмади

Олий суд судьялари Қашқадарё вилояти ҳам сайёр қабул ўтказди. Сайёр қабулда 36 нафар мурожаатчи шикояти тингланди. Бу ҳақда «Дарё» мухбири хабар бермоқда.

«Олий суд раиси келади дейишганди, — дейди Китоб туманидан келган мурожаатчи Шарофат Садинова. – Аммо раҳбар келмабди. Бунақада муаммоимиз ҳал бўлармикин?»

Жиноят ишлари бўйича Қашқадарё вилоят суди матбуот хизматининг маълумот беришича, Ўзбекистон Республикаси Президентининг «Суд-ҳуқуқ тизимини янада такомиллаштириш ва суд ҳокимияти органларига ишончни ошириш чора-тадбирлари тўғрисида»ги фармони ижросини таъминлаш мақсадида Олий суд судьялари — жиноят ишлари бўйича судья Ҳасан Эгамбердиев, фуқаролик ишлари бўйича судья Абдувоҳид Қосимов, маъмурий ишлар бўйича судья Алишер Маҳмудов ҳамда Ўзбекистон Республикаси Олий судининг жиноят ишлари бўйича судлов ҳайъати раиси Икром Муслимовлар вилоят халқ қабулхонасида сайёр қабул ўтказди.

Маълум бўлишича, қабулда жиноят ишлари бўйича 9 та мурожаат ўрганилиб, 4 таси назорат тартибида қабул қилиниб, 1 та ариза тегишлилиги бўйича юборилиши тўғрисида ҳамда 4 та оғзаки тушунтиришлар берилди. Муборак туманидаги «Геолог» маҳалласи «Ўзбекистон» кўчаси 2/2 уйда яшовчи Худойберди Рўзиев ўзига оид жиноят иши бўйича оқлов ҳукми чиқарилгани юзасидан миннатдорчилик билдирди.

Вилоят маъмурий суди юзасидан 8 та мурожаат ўрганилиб, 7 тасига оғзаки тушунтириш берилиб 1 та шикоят қабул қилинди. Фуқаролик ишлари бўйича эса 16 та мурожаат ўрганилиб, шундан 7 та шикоят ўрганиш учун олиб қолинган, 9 та мурожаатчига оғзаки тушунтиришлар берилган. Иқтисодий ишлар бўйича 3 та мурожаат ўрганилиб, уларга ҳам оғзаки тушунтиришлар берилган.

Эслатиб ўтамиз, 9 март куни Олий суд раиси Козимжон Комилов Андижон вилоятидаги фуқаролар билан сайёр қабул ўтказгани хабар қилинган эди.