9 март куни Ҳиндистон ҳарбий ҳаво кучлари мамлакат шимолидаги Рожастон штати устида Покистон ҳудудидан кўтарилган учиш аппаратини уриб туширди.Бу ҳақда «ТАСС» хабар берди.
Қайд этилишича, учувчисиз аппарат маҳаллий вақт билан 19:30 да Ганганагар шаҳри ҳудудида Ҳиндистон ҳаво ҳудудини бузган. Ҳодиса аниқланиши билан дрон уриб туширилган.
Сўнгги вақтларда икки мамлакат муносабатларидаги кескинлик сезиларли даражада авж олган. Бунга 14 февраль куни террорчи-худкушнинг Ҳиндистон шимолидаги Жамму ва Кашмир вилоятларида ўзини портлатиб юборгани сабаб бўлган. Ушбу теракт оқибатида 45 киши ҳалок бўлган. Ҳужум учун жавобгарликни «Жаиш-э-Муҳаммад» («Муҳаммад лашкари») террорчилик ташкилоти ўз бўйнига олган. Унинг раҳбари Маъсуд Азҳар эса Покистонда жойлашган.
Бунинг ортидан Ҳиндистон Покистонни террористик гуруҳларни қўллаб-қувватлашда айблаган, Исломобод бу айбловларни «асоссиз» дея рад этиб, Деҳлини содир бўлган воқеа юзасидан биргаликда текшириш ўтказишни таклиф қилган.
Изоҳ (0)