Қозоғистон чегара қўшинлари «Газель» кузовига жиҳозланган махфий жойга яширинган Россия Федерациясига кирмоқчи бўлган уч нафар Ўзбекистон фуқаросини топди, дея хабар беради «Sputnik».
Ҳодиса 5 март куни Ғарбий Қозоғистон вилоятида содир бўлган.
«Газель» автомашинаси Россия фуқаросининг бошқарувида бўлиб, Тошкент—Самара йўналиши бўйлаб ҳаракатланган. Чегарачилар автомобилнинг ташқи ва ички ўлчамлари ўртасидаги номувофиқликка, шунингдек кузов ичидаги янги қопламага эътибор қаратган.
«Чегара қўшинлари раҳбари махсус техника воситаларини қўллаган ҳолда чуқур текширув ўтказиш тўғрисида қарор қабул қилган, тергов натижасида кузовнинг олд қисмида қўшимча бўлинма мавжуд бўлиб, унга Ўзбекистон Республикаси фуқаролари яширинганлиги аниқланган», — дейилади хабарда.
Маълум бўлишича, Ўзбекистон фуқаролари Россия Федерациясига кириш ҳуқуқи чекланган бўлгани боис шу йўл билан чегарани кесиб ўтишга уринган.
Изоҳ (0)