Петербургга парвоз қилган Uzbekistan Airways самолёти «Пулково» аэропорти учиш-қўниш йўлагидан чиқиб кетди

2 март куни Тошкент вақти билан 23:59 да Uzbekistan Airways‘нинг Тошкент — Санкт-Петербург йўналиши бўйича парвозни амалга оширган Boeing-767 «Пулково» аэропортига қўниш чоғида учиш-қўниш йўлагидан чиқиб кетди. Бу ҳақда компания матбуот хизмати маълум қилди.

Ҳаво кемаси шикастланмади, йўловчиларни шошилинч эвакуация қилиш талаб этилмади. Ҳодисага об-ҳаво шароитлари ва учиш-қўниш йўлаги ҳолати сабаб бўлиши мумкинлиги билдирилмоқда.

Самолёт бортида 241 нафар йўловчи ва 15 нафар экипаж аъзоси бўлган.

Ҳодиса сабаб HY632/02МАR19 рейсининг учирилиши вақти кўчирилди. Авиакомпаниянинг Санкт-Петербургдаги ваколатхонаси ушбу рейс йўловчиларини меҳмонхонада жойлаштириш чорасини кўрди.

Россия тергов қўмитаси ва Росавиация «Пулково» аэропортидаги ҳолат юзасидан текширув олиб бормоқда.