Ўзбекистонда «Оила энциклопедияси» ва «Хотин-қизлар энциклопедияси» нашрдан чиқди

«Ўзбекистон миллий энциклопедияси» давлат илмий нашриёти Ўзбекистон Хотин-қизлар қўмитаси ва Вазирлар Маҳкамаси ҳузуридаги «Оила» илмий-амалий тадқиқот маркази билан ҳамкорликда «Оила энциклопедияси» ҳамда «Хотин-қизлар энциклопедияси» китобларини нашрдан чиқарди.

«Оила энциклопедияси»да оила институтининг ёш авлодни маънан кучли, ақлан етук, баркамол қилиб тарбиялашдаги роли ва аҳамияти, оиладаги шахслараро муносабатларнинг турлари тўғрисидаги маълумот келтирилган.

Соғлом психологик муҳитни таркиб топтиришда ота-оналарнинг ҳуқуқий, маънавий, тиббий, иқтисодий, психологик билимларини фарзанд тарбиясида қўллай олиш чоралари ҳақида тавсиялар берилган.

Мазкур энциклопедияларни кенг омма эътиборига тақдим этиш мақсадида 5 март куни Ўзбекистон Ахборот ва оммавий коммуникациялар агентлигида тақдимот маросими ўтказилиши режалаштирилган, дея хабар бермоқда «Xabar.uz».