Поп туманида «Ҳар бир оила – тадбиркор» дастури учун 100 млрд сўмдан зиёд пул ажратилади

Наманган вилоятининг Поп туманида Халқ банки бошқаруви раиси Абдурасул Абдуллаев иштирокида учрашув ташкил этилди, дея хабар бермоқда «Xabar.uz».

Учрашувда туман секторлари раҳбарлари, туман фаоллари, туман маҳалла фуқаролар йиғини раислари, тегишли ташкилот раҳбарларига «Ҳар бир оила – тадбиркор»давлат дастурининг мазмун-моҳияти, бу борада тижорат банклари томонидан амалга ошириладиган лойиҳалар юзасидан маълумотлар берилди.

Поп туманида истиқомат қилаётган аҳолининг бандлигини таъминлаш, турмуш даражасини янада яхшилаш мақсадида 2019 йилдан «Ҳар бир оила – тадбиркор» дастури доирасида 100,0 миллиард сўмдан зиёд маблағ ажратилиши белгиланган.

Мазкур маблағлар ҳудуддаги аҳолига паррандачилик, чорвачилик, асаларичилик, иссиқхона, шунингдек, бошқа турдаги тадбиркорлик йўналишларини янада ривожлантириши учун имтиёзли фоизларда кредит сифатида берилади.

Тадбир сўнггида ҳудуддаги маҳалла фуқаролар йиғини раислари ва бириктирилган маъсул ходимларга туман аҳолиси билан бирма-бир суҳбатлашиб, ажратилаётган маблағларни мақсадли, танланган тадбиркорлик йўналишларида ишлатишлари бўйича доимий иш ташкил этиб боришлари бўйича кўрсатмалар берилган.

Аввалроқ россиялик миллиардер Алишер Усмонов Наманган вилоятида амалга ошириладиган «Обод қишлоқ» дастури учун 50 миллион доллар ажратиши ҳақида хабар берилган эди.