Коррупция учун жазо муддатини ўтаётган Бразилиянинг собиқ президенти Луис Инасиу Лула да Силва неварасининг ўлими сабабли қамоқдан вақтинча озод этилиши мумкин. Бу ҳақда «РИА Новости» хабар берди.
Унинг олти неварасидан бири етти ёшли Атур Араужо Лула да Силва менингит касаллиги оқибатида вафот этган. Собиқ президент дафн маросимида иштирок этиш учун рухсат сўраган ва унинг сўрови қаноатлантирилган.
Бир ой аввал маҳбусга унинг вафот этган акаси билан хайрлашишга рухсат берилмаган эди. Унда суд собиқ президентга фақат дафн маросимидан кейинги оилавий учрашувда иштирок этишга рухсат берган, у эса турмада қолишни танлаган.
Лула да Силва ўтган йилнинг апрелида коррупция иши бўйича қамоқ жазосини ўташ учун Куритиба шаҳрига етказилган. У 2018 йилнинг январь ойида 12 йил-у бир ойга қамоқ жазосига ҳукм қилинган.
Изоҳ (0)