Екатеринбург аэропортида «яшил йўлак»дан костюмлар олиб ўтишга уринган наманганликлар тўхтатилди

Колсово аэропорти божхоначилари тижорий мақсадларда олиб келинган костюмлар билан «яшил йўлак»дан ўтишга уринган Тошкент — Екатеринбург рейсининг икки йўловчисини тўхтатди. Бу ҳақда «Областная газета» нашрига таяниб, «Наманганская правда» хабар берди.

Уларнинг иккиси ҳам Намангандаги тикувчилик корхонаси вакиллари эканлиги, Екатеринбургга эркаклар костюмлари етказиб беришни йўлга қўйиш учун келганлиги билдирилмоқда.

Таклиф қилган томон билан дастлабки келишувга биноан наманганликлар Екатеринбургга 21 та костюм, шунингдек, ассортиментни кенгайтириш учун матолар намуналари келтирган.

Ҳозирда уларга нисбатан маъмурий ҳуқуқбузарликка оид икки иш қўзғатилган. Маҳсулотлар мусодара қилинган ва қийматини аниқлаш (жарима ҳажми шунга боғлиқ) учун экспертларга юборилган.

Тадбиркорлар костюмларни қайтариб олишлари мумкин: бунинг учун жаримани тўлаб, маҳсулотларини божхонада тегишли тартибда расмийлаштиришлари зарур.