Хитойнинг Zhongye Wanda компанияси раҳбари Фенжу Жианг, Тайваннинг Kai Shing Trading компанияси раҳбари Тен Сюекай ва Малайзия халқаро савдо ассоциацияси (SMITA) катта маслаҳатчиси Томас Су ишчи ташриф билан Наманганга келди, дея хабар бермоқда ЎзА.
Вилоят ҳокимлигида бўлиб ўтган учрашувда хорижлик инвесторлар томонидан қурилиш йўналишидаги инвестиция лойиҳалари тақдим этилган.
Жумладан, Zhongye Wanda компанияси Наманган шаҳрида меҳмонхона комплекси, бизнес-апартаментлар, 20 қаватли офис биносини ўз ичига олган ақлли экошаҳар қуриш лойиҳасини намойиш этган.
«Умумий қиймати 70 миллион доллар бўлган бу лойиҳа 20 гектар майдонда барпо этилиши кўзда тутилган», — дейилади агентлик ахборотида.
Тайваннинг Kai Shing Trading компанияси эса катта майдонда товуқ боқиш, товуқ гўштини қайта ишлаш ва товуқ эссенсияси ишлаб чиқаришни ўз ичига олган паррандачилик кластери лойиҳасини тақдим этган.
Хабар беришларича, умумий қиймати 40 миллион доллар бўлган мазкур лойиҳа ҳаётга татбиқ этилса, йилига 20 миллион бош товуқ етиштириб, унинг гўштини қайта ишлаш имкониятлари яратилади.
«Ҳар икки лойиҳа вилоят ҳокимлиги томонидан ижобий қабул қилинди ва ҳамкорлик таклифи билан келган сармоядорларга қурилиш учун ер майдонлари кўрсатилди. Учрашувда ҳар икки компания билан инвестицион шартнома имзолашга келишиб олинди», — деб ёзади ЎзА.
Изоҳ (0)