Ёшлар ижод саройида Ўзбекистонда илк бор наслли қуёнлар кўргазмаси бўлиб ўтди. Бу ҳақда «Дарё»га Инновацион ривожланиш вазирлиги матбуот хизмати маълум қилди.
Ўзбекистон наслли қуён етиштирувчилар ассоциацияси ҳамда Ёшлар иттифоқи томонидан ташкил этилган мазкур тадбирда 22 та иштирокчи — фермер хўжаликлари аъзолари, тадбиркорлар ва ишқибоз қуён боқувчилар қатнашди. Кўргазманинг «бош қаҳрамонлари» эса 6 та зотга мансуб ва 20 хилдан ошиқ рангдаги 90 та зотдор қуёнлар бўлиб, улар кўргазмага келганларни ранглари, ўлчамлари, момиқлиги билан ҳайратда қолдирди.
Ўзбекистон наслли қуён етиштирувчилар ассоциацияси ўтган йилнинг охирида ташкил топган, расман энди 12 кишини аъзоликка қабул қилган бўлса-да, соҳага қизиқувчиларнинг кўплиги кўргазмада иштирок этаётган қатнашчилар ва ташрифчиларнинг гап-сўзларидан маълум.
Зотдор қуён боқиш амалиёти Ўзбекистонга энди кириб келаётгани боис, оддий, жайдари қуён боқувчиларининг кўргазмада тажриба орттириб кетишига имконияти туғилди. Ассоциация фаолиятининг муҳим йўналишларидан бири ҳам қуёнчилик соҳасига малакали мутахассислар етиштириб беришдан иборат.
—Қуён боқиш фақат бир қарашда осон, – дейди ассоциация раиси Элмурод Ортиқов. –Бу соҳани ривожлантириш учун илмий асосланган тажрибаларга таянишимиз, ўзимизда қуёнчилик соҳасининг илмий-амалий базасини ташкил этишимиз талаб этилади. Кўргазма доирасида профессионал ва ҳаваскор қуён боқувчилар учун семинар-тренинг ҳам ташкил этдик, унга россиялик ва ўзбекистонлик етакчи мутахассисларни жалб қилдик.
Бугунги кунда наслли қуёнлар Ўзбекистонда на гўштга, на терига сўйилади. Кўргазмага олиб келинган қуёнларнинг вазифаси айни кунларда насл қолдириш ва уларни маҳаллий иқлим шароитига кўникишидир. Қуёнлар бир йилда бир неча марта насл қолдира олади, бироқ уларнинг Ўзбекистон об-ҳавоси, озуқасига кўникиши учун вақт ва шароит яратилиши лозим. Энг катта муаммолардан бири эса Ўзбекистонда айнан зотдор қуёнлар билан шуғулланувчи олимлар етишмаслигидир.
Инновацион ривожланиш вазирлиги қошидаги Илғор технологиялар маркази СAT илмий акселератори иштирокчиси, чорвачилик учун ем тайёрлашнинг янги усулларини жорий этаётган NEF жамоаси аъзоси Иброҳим Ҳидоятовнинг айтишича, хориждан олиб келинган наслдор қуёнларга аксарият ҳолларда Ўзбекистон иқлимида етиштирилган ўсимликлардан тайёрланган бирорта озуқа тўлиқ мос келмайди. Қуёнчилар тажриба йўли билан ўзлари боқаётган қуёнларнинг ҳолатига қараб озуқа беришга мажбур. Натижада хатоларга ҳам йўл қўйилади, бу ўз навбатида ҳайвонларнинг касалланиши, ҳатто нобуд бўлишига ҳам олиб келиши мумкин. Оқибатда қуёнчилик соҳасининг ривожланишига тўсиқ пайдо бўлади.
Мана шу муаммоларни ҳал қилиш мақсадида NEF жамоаси кўргазма давомида Ўзбекистон наслли қуён етиштирувчилар ассоциацияси билан тажриба полигони ташкил қилишга келишди. Полигонда наслли қуёнларнинг озуқага бўлган эҳтиёжини қондирувчи ем вариантларини яратиш мақсад қилинди.
Изоҳ (0)