Қашқадарё вилоят ички ишлар бошқармаси бошлиғи, 3-сектор раҳбари Дилшод Турсунбаев вилоятнинг чекка туманларидан бири Муборак туманининг Чорвадор маҳалласида сайёр қабул ўтказди. Бу ҳақда «Дарё»га вилоят ИИБ матбуот хизмати хабар бермоқда.
Маълум бўлишича, Президентнинг 2019 йил 8 январдаги «Ҳудудларни комплекс ижтимоий-иқтисодий ривожлантириш бўйича секторлар фаолиятини янада такомиллаштиришга доир қўшимча чора-тадбирлар тўғрисида»ги қарори асосида вилоят прокурори ўринбосари Шерали Ашуров, Муборак тумани ҳокими Ғайрат Жовлиев ҳамда туман ИИБ масъул ходимлари иштирокида ўтган сайёр қабулда Ёшлик, Қурувчилар, Сариқ, Қорақум, Чорвадор, Обод турмуш ва Олмазор маҳаллаларида яшовчи 300 дан ортиқ фуқаро қатнашган.
- Сайёр қабул давомида ижтимоий дорихона ташкил этиш масаласида ёрдам сўрадим, — дейди Чорвадор маҳалласида яшовчи Сайёра Сайимова. – Шунга асосан туман ҳокимлиги ва кадастр идорасидан келиб ер майдонини кўрсатишди. Ҳозирда тегишли ҳужжатлар расмийлаштирилаяпти.
Вилоят ИИБ матбуот хизматининг маълумот беришича, мурожаатлар асосан ички ишлар идораларига ишга кириш, паспорт олиш, мол-мулкни ундириш, уй-жой масалаларига оид бўлган. Шунга мувофиқ 14 та мурожаат жойида ижобий ҳал қилинди, биттаси ижрога йўналтирилди, қолганлари бўйича тегишли тушунтиришлар берилди.
Изоҳ (0)