Хоразм вилоят судида ўтган очиқ суд мажлисида гиёҳвандлик воситалари савдоси билан шуғулланган ва бангихона ташкил этган гуруҳ аъзоларига суд ҳукми ўқилди. Бу ҳақда ЎзА хабар берди.
Ўктам, Жавлон ва Мансур (исмлар ўзгартирилган) исмли шахслар бир гуруҳ бўлиб гиёҳвандлик воситалари савдоси билан шуғулланиш йўлига киради. Жумладан, судланувчи Ўктам Самарқанд вилоятида яшовчи Мансур билан келишган ҳолда ундан ҳар бир граммини 250.000 сўмдан ҳисоблаб, 8.88 граммга тенг «опий» гиёҳвандлик моддасини 400 АҚШ долларига сотиб олиб, Самарқанд вилоятидан йўловчи машинада Хоразм вилоятига олиб келиб, Жавлонга сотган.
Жавлон шу вақтнинг ўзида гиёҳвандлик моддасини олиб, ўзи яшаб келаётган уй меҳмонхонасида бангихона ташкил қилган.
Суд ҳукми билан Ўктамга 7 йил, Жавлонга 8 йил ва Мансурга 10 йил озодликдан маҳрум этиш жазолари тайинланди.
Шунингдек, судланувчи Мансур муқаддам ўта оғир жинояти учун 11 йил 6 ой муддатга озодликдан маҳрум қилиш жазоси тайинланганлиги ва судланганлик муддати ўтмасдан яна ўта оғир жиноят содир этганлиги сабабли Жиноят Кодексининг 34-моддасига асосан ўта хавфли рецидивист деб топилиб, жазони махсус тартибли колонияларда ўташи белгиланди.
Маълумот учун, 2018 йил давомида жиноят ишлари бўйича Хоразм вилоят, туман (шаҳар) судлари томонидан 162 нафар шахсга нисбатан гиёҳвандлик воситалари билан боғлиқ жами 108 та жиноят иши кўриб чиқилган.
Изоҳ (0)