Самарқанд вилоят ИИБ ҳамда Ўзбекистон ёшлар иттифоқи Самарқанд вилоят Кенгаши ҳамкорликда бозорларда, жамоат жойларида вояга етмаган ёшларнинг дарс машғулотлари вақтида мақсадсиз юриш ҳолатларини аниқлаш бўйича ўтказилган назорат тадбири давомида 16 нафар вояга етмаган бола вилоят ИИБ қошидаги Вояга етмаганларга ижтимоий-ҳуқуқий ёрдам кўрсатиш Марказига олиб келинди.
«Дарё» мухбири Фарҳод Норбўтаевнинг маълум қилишича, доимий яшаш жойлари ва ўқиш жойларидан сўроқсиз чиқиб кетган 8 нафар ёшлар шу жойнинг ўзида ота-оналари бағрига қайтарилган. Қолган 8 нафари махсус мактаб интернатларига йўналтирилган. Хусусан, уларнинг 2 нафари Самарқанд шаҳридаги 64-сонли ўғил болалар махсус мактаб-интернатига, 2 нафари Сирдарё вилояти Бахт шаҳар ўғил болалар касб-ҳунар коллежига, 1 нафари Фарғона вилояти Қўқон шаҳридаги қиз болалар енгил-саноат касб-ҳунар коллежига, 3 нафари Тошкент вилояти Чиноз шаҳридаги 5-сонли қиз болалар махсус мактаб-интернатига ўқишга жойлаштирилиши учун ҳужжатлар тайёр бўлгунга қадар Марказда сақланмоқда.
Маълумот ўрнида шуни таъкидлаш жоизки, 2019 йилнинг ўтган даври мобайнида Вазирлар Маҳкамасининг «Ички ишлар органларининг вояга етмаганларга ижтимоий-ҳуқуқий ёрдам кўрсатиш Маркази тўғрисида»ги Низомга асосан ўтган давр мобайнида жами 142 нафар вояга етмаганлар марказга олиб келинган. Ушбу кўрсаткич ўтган 2018 йилда 118 нафарни ташкил этган. Қабул қилинган 142 нафар вояга етмаганлардан 2 нафари Фарғона вилояти Қўқон шаҳридаги 4-сонли қиз болалар махсус касб-ҳунар коллежига ва 1 нафари Самарқанд шаҳридаги 1-сонли меҳрибонлик уйига жойлаштирилган.
Изоҳ (0)