Сирдарё вилоятида инвестиция дастури доирасида амалга оширилаётган ишлар ҳудуд аҳолиси бандлигини таъминлаш, шу орқали даромади юксалишига хизмат қилмоқда, деб ёзади ЎзА.
Ўтган йили умумий қиймати 94,1 миллион АҚШ доллари, жумладан, 78,8 миллион доллар миқдоридаги тўғридан-тўғри хорижий инвестиция ҳисобига 20 та лойиҳа амалга оширилди.
Жорий йилда 25 та лойиҳани ишга тушириш ҳисобига 3 мингдан ортиқ кишининг бандлиги таъминланади. Хорижий инвестиция лойиҳаларининг тўлиқ амалга оширилиши натижасида йиллик саноат маҳсулотлари ишлаб чиқариш қуввати 1,3 триллион сўмга, экспорт ҳажми эса 33 миллион долларга ортишига эришилади.
Масалан, Сирдарё туманида Хитойнинг 17 миллион долларлик инвестицияси ҳисобига металлни чуқур қайта ишлашга ихтисослашган «Vanda group» қўшма корхонаси, Янгиер шаҳрида Туркиянинг 65 миллион долларлик инвестиция киритиши натижасида озиқ-овқат маҳсулотлари ишлаб чиқаришга мўлжалланган «Беслер» қўшма корхонаси, шунингдек, Оқолтин туманида Жанубий Кореянинг 3,8 миллион долларлик инвестицияси ҳисобига момиқ сочиқлар ишлаб чиқаришга мўлжалланган «Оқолтин текстиль» қўшма корхонаси ишга туширилади.
Яна бир маълумот, 2018 йилда вилоятга қиймати 60 миллион АҚШ доллари миқдоридаги хорижий инвестиция киритилди. Бу 2017 йилга нисбатан 3,5 баробар кўпдир.
Изоҳ (0)