Погба Мбаппега, Сульшер эса Тухелга қарши. Барчаси бугун «Олд Траффорд»да бўладиган МЮ—ПСЖ баҳси ҳақида (превью)

Бугундан бошлаб Европа яна клублар ўртасидаги энг нуфузли мусобақа — УЕФА Чемпионлар Лигаси ҳавосидан нафас ола бошлайди. 1/8 финалнинг энг қизиқарли тўқнашувларидан бири Манчестер шаҳрида бўлиб ўтади.

Унда Жозе Моуриньо кетгач, Оле-Гуннар Сульшер билан мағлубиятсиз одимлаётган «Манчестер Юнайтед» ўзининг уй стадиони, «Орзулар театри» — «Олд Траффорд»да, айни дамда жамоа етакчиларидан айрилган Томас Тухель бошчилигидаги ПСЖ клубини қабул қилади. Шу учрашув ва унинг атрофидаги воқеалар ҳақида бироз фикрлашсак, зарар қилмайди, азиз мухлис, шундай эмасми?!

Нимчорак финал босқичига қуръа ташланган вақтда ПСЖ мухлислари ўзида йўқ хурсанд бўлгани айни ҳақиқат. Боиси, ўша вақтда Жозе Моуриньо бошчилик қилган «Юнайтед»да ўйин борасидаги муаммолардан ташқари ички низолар ҳам пайдо бўлган ва бу ҳақда маҳаллий ва чет эл ОАВларида тинмасдан бонг урилаётганди. ПСЖда эса бу вақтда Неймар—Кавани—Мбаппе триоси тўхтамасдан голлар урар, Франция чемпионатида мағлубиятсиз одим, хуллас, ҳамма-ҳаммаси жойида эди. Аммо ҳозир асло ундай эмас. Орада «Special one» «Юнайтед»дан бадарға қилинди, унинг ўрнига эса бир вақтлар клубнинг «олтин таёқчаси» вазифасини ўтаган, мураббийликда эса ҳали ном қозонишга улгурмаган Оле-Гуннар Сульшер олиб келинди. Бошида «Қизил иблислар»нинг мухлислари ҳам бу алмашувга гумон билан қарагани ҳам бор гап. Бироқ бу шунчаки захира варианти бўлиб чиқмади, аксинча, «супер алмаштириш»га айланди. Сульшер қўл остида манчестерлик йигитлар 11 та ўйин ўтказиб уларнинг ҳеч бирида мағлубиятга учрамади — 10 та ғалаба, 1 та дуранг. Орзуларга татийдиган дебют шундай эмасми!? ПСЖ эса бу орада бир қанча йўқотишларга учради. Хўш, бугун кимнинг қўли баланд келади, кимнинг имконияти кўпроқ, майдонга кимлар тушади?

Таркиблар ҳақида

ПСЖ

ПСЖ учрашувга «яраланган аҳвол»да келмоқда. Парижликлар ўзининг икки «страйкери» Неймар ҳамда Эдинсон Каванидан жароҳат сабаб фойдалана олмайди. Қўшимчасига бельгиялик ҳимоячи Тома Менье жароҳат олиб сафдан чиқди ва у ҳам бугунги ўйинни ўтказиб юборади. Парижликларнинг бор умиди эндиликда 20 ёшли ЖЧ—2018 чемпиони Килиан Мбаппега қаратилган. Мбаппе бугун ПСЖнинг асосий ҳужумчиси сифатида майдонда ҳаракатланади. Унга ҳужумда тажрибали Анхел ди Мария ҳамда Юлиан Дракслер ёрдам беради. Таянч ярим ҳимояда эса асосий вазифаси ҳимоячи бўлса-да бразилиялик Маркинёс ўйнаши кутилмоқда. Сал олдинроқда бўлса, эндигина жароҳатдан қутулган Марко Вератти ва Дани Алвеш тўп суради. Марказий ҳимояда Тиаго Силва—Преснел Кимпембе тандеми ҳаракатланса, қанотлар Керер ҳамда Хуан Бернатга ишониб топширилиши кутилмоқда. Хуллас, бугун ПСЖга осон бўлмаслиги аниқ.

«Манчестер Юнайтед»

Сульшер жамоасида деярли йўқотишлар йўқ. Фақат жамоа сардори Антонио Валенсияни ҳисобга олмаса. Валенсия жорий мавсум жароҳати сабаб айтарли майдонга тушмади. Шу боисдан унинг йўқлиги «манкунианлар»нинг ўйинига жиддий таъсир қилмаслиги аниқ. Кичик жароҳат сабаб АПЛнинг 26-турида «Фулҳэм»га қарши ўйинни ўтказиб юборган Виктор Линделёф катта эҳтимол билан асосий таркибга қайтади. Раньери жамоасига қарши ўйинни асосий таркибда бошлаган Ромелу Лукаку ҳамда Хуан Мата бу сафар ўйинни захирада бошласа, ажаб эмас. Боиси, ПСЖга қарши баҳсда, улардан тезкор ва иштиёққа тўла Маркус Рэшфорд ва Жесси Лингард кўпроқ фойда келтириши мумкин. Шунингдек, «Фулҳэм»га қарши баҳсда қойилмақом ўйин кўрсатган Антони Марсиал Алексис Санчесдан кўра, асосий таркибга муносиб эканлиги аёнлашиб қолди. Катта эҳтимол билан Сульшер шогирдлари бугунги ўйинда 1-рақам остида ҳаракат қилади.

Қизиқарли фактлар

• ПСЖнинг Чемпионлар Лигасидаги сўнгги 21 та ўйинидан 21 тасида ўртача 2,5 тадан ортиқ гол киритилган.
• ПСЖ сўнгги бор Чемпионлар Лигасида жорий мавсум доирасида 1-тур баҳсида «Ливерпуль»га ютқазган.
• ПСЖ Чемпионлар Лигасининг сўнгги 6 та ўйинидан 5 тасида камида 2 та гол урди.
• 2019 йилда жамоалар атиги битта ўйинда дуранг ўйнади.
• Қишки трансферлар вақтида иккала жамоани ҳам асосий таркиб футболчилари тарк этмади. «Юнайтед» фақатгина Маруан Феллаинини Хитойга жўнатди. Бирор футболчини харид қилмади. ПСЖ эса Леандро Паредесни 40,2 миллион евро эвазига ўз сафига қўшиб олди.
• Европа Чемпионлар Лигасининг 1/8 финал босқичидан бошлаб мусобақа тарихида илк бор VAR (Ҳакамнинг видеотакрорлар бўйича ёрдамчиси) тизими қўлланилади.

Учрашув ҳаками

Беллашувни италиялик Даниэле Орсато бошқариб боради. У 2018/19 йилги мавсумда 6 та халқаро учрашуни бошқарди. Бу ўйинларда у 17 та сариқ карточка кўрсатган (битта ўйинга ўртача 2,8 та сариқ карточка). Бирор футболчини майдондан четлатмаган. Битта ўйинда ўртача 19 та қоида бузилишини қайд этган. Ўйинларнинг 17 фоизида эса дарвозалар томон пенальти белгилаган.

Тахминий таркиблар

Ўйиндан олдин фикрлар

Парижликлар ҳамма нарсага қодир. Улар жисмоний ва техник жиҳатдан кучли, бу орқали улар ўзларига бўш ҳудудларни пайдо қила олади. Мбаппе — ҳаддан ташқари тезкор футболчи. Бунда унга етадигани йўқ. Тухел эса ажойиб тактик мураббий. 3-4-3, 4-4-2 ёки 4-3-3 схемаларидан бирини танлашимиз мумкин. Қайси биридан устунлик қила олишимизини ўйлаш зарур. «Юнайтед»нинг ўзигагина хос бўлган ўйин услубини қайтаришимиз керак. Агар ўз режаларимизни амалга ошира оладиган бўлсак, «Олд-Траффорд»да ҳеч кимга осон бўлмайди.

Оле-Гуннар Сульшер, «Манчестер Юнайтед» бош мураббийи

«Манчестер Юнайтед» декабрдаги ҳолатидан тубдан фарқ қилади. Жамоа айни дамда ўзига бўлган катта ишонч билан тўп сурмоқда. Кўплаб голлар урмоқда ва ҳужумга тез-тез ўтиб турибди. Улар билан ҳозирги ҳолатда учрашиш, биз учун энг жиддий ва оғир синовлардан бири бўлиши, шубҳасиз. «Олд Траффорд»да имкониятлар эса 50 га 50. Сульшер қўл остида улар мафтункор ўйин намойиш қилмоқда. Уларга совға қилишга ҳақимиз йўқ. Ўйин тактик ва жисмоний жиҳатдан қийин кечади. Ўзимизнинг яхши тарафларимизни кўрсата оламиз, деб умид қиламан.

Томас Тухель, ПСЖ бош мураббийи