10 февраль, якшанба куни футбол бўйича Англия премьер лигаси 26-турининг марказий ўйини Манчестер шаҳрида бўлиб ўтади.
Учрашувлар тарихи
Мазкур тўқнашув «шаҳарликлар» ва «аристократлар» ўртасидаги 160-ўйин бўлади. Ҳозирча статистика Лондон клуби фойдасига. «Челси» шу кунга қадар «Сити» устидан 65 та ўйинда ғалаба қозонган. 39 та учрашувда томонлар сулҳга рози бўлган бўлса, 55 та беллашувда Манчестер шаҳри жамоасининг қўли баланд келган. Тўплар нисбати ҳам «Челси»нинг устунлигини кўрсатмоқда — 220-200.
Жамоалар 2018/19 йилги мавсумда 2 бор тўқнаш келишга улгурди. Биринчиси мавсум аввалида содир бўлди. 2018 йилнинг 5 августида «Сити» Англия Супекубоги доирасида «Челси»ни 2:0 ҳисобида таслим қилган, Серхио Агуэро бўлса дублга эришганди. Улар ўртасидаги сўнгги тўқнашув 2018 йил 8 декабрь санасига тўғри келиб, бу сафар «кўклар» Нголо Канте ҳамда Давид Луиснинг голлари эвазига 2:0 ҳисобидаги ғалабани тантана қилганди.Мусобақа жадвалидаги ҳолат
«Манчестер Сити»
«Сити» ҳафта ўртасида «Эвертон» меҳмони бўлиб, Аймерик Ляпорт ҳамда Габриэль Жезусларнинг голлари сабаб 3 очкога эга бўлди. Учрашув аслида 23 февраль куни ўтказилиши лозим эди, бироқ «Ман Сити» 24 февраль куни Англия Лига Кубоги мусобақаси финалида яна «Челси» билан баҳс олиб боради. Шу боисдан мазкур ўйин 6 февралга сурилди. Ушбу ўйиндаги ғалаба сабаб «Сити» вақтинча бўлса ҳам АПЛ (62 очко билан) мусобақа жадвалида пешқадам бўлиб турди. Гвардиола жамоаси ўз майдонида ўтган 13 та ўйиннинг барчасида ғалаба қозониб, 36 та очко жамғарган. 43 та гол уриб, 11 та гол ўтказган, холос. «Сити» АПЛда ҳозирча энг кўп гол урган жамоа бўлиб турибди — 68 та. Ўтказиб юборилган голлар сони эса 20 тани ташкил этмоқда. Бу борада «шаҳарликлар» фақат «Ливерпуль»дан орқада. «Қизиллар» атиги 15 та гол ўтказиб юборган.«Челси»
«Челси» 25-турда «Ҳаддерсфилд»ни ўз майдонида қабул қилди ва йирик 5:0 ҳисобида ғалаба қозониб, ўтган турда «Борнмут»дан қабул қилинган 0:4 ҳисобидаги мағлубият учун мухлислари олдида юзини бироз бўлса-да ёруғ қилиб олди. Учрашувда қишки трансферлар ойнаси вақтида «Ювентус»дан ижарага олинган Гонсало Игуаин дублга эришди. Шунигдек, жамоа лидери Эден Азар ҳам ўз номини таблога икки бор ёздириб қўйишни уддалади. Яна бир гол эса ҳимоячи Давид Луис ҳисобига ёзилди. Мазкур гол сабаб Маурицио Сарри шогирдлари ўз очколари сонини 50 тага етказиб, 4-ўринга чиқиб олганди. Аммо «Манчестер Юнайтед»нинг 26-турда «Фулҳэм» устидан ғалабаси «аристократлар»ни яна 5-ўринга равона қилди. Сарри жамоаси шу кунга қадар АПЛ жорий йилги мавсумида сафарда 12 та ўйин ўтказди. Уларда эса 22 очко тўплашнинг уддасидан чиқди. 19 та гол уриб, 14 та гол ўтказди. Сафардаги 2 та ўйинда улар битта ҳам гол ура олмасдан ютқазди. «Арсенал»га 0:2, «Борнмут»га эса 0:4.Таркиблардаги муаммолар
«Манчестер Сити»
«Шаҳарликлар»га мазкур баҳсда жароҳати боис Клаудио Bravo (аслида унинг йўқлиги деярли билинмайди, боиси захира посбони), ҳимоячилар — Бенжамен Менди ҳамда Венсан Компани ёрдам бера олмайди. Қолган футболчилар эса ўйинга тўлиқ тайёр.«Челси»
«Аристократлар» сафида жароҳати сабаб Марко ван Гинкел, Гари Кеҳилл ва Каллум Ҳадсон-Одои (уларнинг ҳеч бири асосий таркиб футболчиси эмас) майдонга туша олмайди.Учрашув ҳаками
26-тунинг марказий баҳсини тажрибали ва қаттиққўл ҳакам Майк Дин бошқариб боради. Дин 2018/19 йилги мавсумда 19 та ўйинда ишлади. У бу баҳсларда 85 та сариқ карточка кўрсатиб, 9 марта ўйинчиларни қизил карточка билан сийлади. У бошқарган ўйинларнинг 21% да пенальти белгиланган. Бугун ҳам 11 метрлик жарима зарбасини кўриш эҳтимоли йўқ эмас. Шунингдек, Дин бугун фаолиятидаги 100-қизил карточкасини кўрсатиши мумкин. Қайд этиш жоиз, Дин ҳозиргача «Сити» ва «Челси»дан бир хил — 9 нафардан ўйинчини майдондан четлатишга улгурган. Хуллас, бугун ҳакамлик ҳам ажойиб бўлади.
Қизиқарли фактлар
- «Манчестер Сити» АПЛ доирасида ўз майдонида ўтган сўнгги 14 та учрашувда камида 2 тадан гол урди;
- «Манчестер Сити» АПЛ доирасида ўз майдонида ўтган сўнгги 14 та учрашувнинг 13 тасида ғалаба қозонди;
- «Челси» ўтган турда 5 та гол урди. Бу «кўклар» учун АПЛ тарихида 5 тадан кам гол урилмаган 37-ўйин бўлди;
- «Челси» АПЛнинг сўнгги 10 та мавсумида «Манчестер Сити»ни ҳам уйда ҳам сафарда энг кўп ютган жамоа;
- Гвардиола АПЛ доирасида «Челси»га 3 марта ютқазган, у фаолияти давомида бошқа ҳеч бир клубга бунчалик кўп мағлуб бўлмаган.
Тахминий таркиблар
«Манчестер Сити»: Эдерсон – Уокер, Стоунс, Отаменди, Ляпорт – де Брюйне, Фернандиньо, Давид Силва – Стерлинг, Агуэро, Сане
«Челси»: Кепа – Аспиликуэта, Рюдигер, Давид Луис, Алонсо – Канте, Жоржиньо, Ковачич – Виллиан, Игуаин, Азар
Ўйиндан олдин фикрлар
«Челси»нинг қандай футбол ўйнашга ҳаракат қилаётганини кўриб, тушуниб ўтирибман. Улар нима хоҳлаётганини жуда яхши билади. Бу йигитлар билан ўйин биз учун финалга тенг бўлади. Уларнинг ҳужум ва ярим ҳимоя чизиғи жаҳон даражасидаги футболчилардан ташкил топган. Қўшимчасига яхши дарвозабон ва тажрибали ҳимоячилари бор. Бу мавсум улар учун жуда яхши ўтмоқда: Англия Лига Кубоги финали, Европа Лигасида ғалабали одим ва АПЛ чемпионлиги учун имконият сақланиб турганлиги. Ҳа, «Челси» 9 очко ортда қолмоқда, бироқ олдинда кўплаб ўйинлар турибди.Пеп Гвардиола, «Манчестер Сити» бош мураббийи
Бизнинг кучимиз ушбу мавсумда кучли тўртликка кириш учун курашишдан бошқасига етмайди. Албатта, нимадир ютишимиз мумкин. Аммо АПЛ ғолиблиги учун кураш «Ливерпуль» ва «Сити» ўртасида кечмоқда. «Манчестер Сити» — менинг қарашларим бўйича Европанинг энг кучли жамоаси. Улар ҳар бир жамоа учун намуна ҳисобланади. Гвардиола АПЛда учинчи, Клопп эса тўртинчи ёки бешинчи мавсумини ўтказмоқда. Биз эса ишлашимиз лозим. Мен бошқа йўлни билмайман. Шунчаки ишлашда давом этиб, орадаги фарқни қисқартиришга ҳаракат қилиш керак. Бизга барқарорлик керак эканлигини яхши биламиз. Якшанба куни ўзимизнинг энг кучли тарафларимизни намойиш этамиз деган умиддаман.Маурицио Сарри, «Челси» бош мураббийи
АПЛ
26-тур баҳслари
10 февраль, якшанба
«Манчестер Сити»—«Челси» 21:00
Бош ҳакам: Майк ДинЯнада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)