ХТВ Олмазор туманида хусусий мактаб қуриш учун бепул ер майдони таклиф қилмоқда

Халқ таълими вазирлиги халқ таълими соҳасида давлат-хусусий шериклик (ДХШ) лойиҳаларида иштирок этиш учун танлов эълон қилди, деб ёзади Spot.

Унга кўра, Олмазор тумани, Ғалаба кўчаси, 3-а манзилида жойлашган 185-сон мактабнинг бўш ер майдонида (3700 квадрат метр) (кейинги ўринларда — ДХШ объект) нодавлат умумтаълим муассасаси жорий этиш режалаштирилмоқда.

ДХШ объектининг белгиланган ҳудуди танлов ғолибига 30 йилга узоқ муддатга беғараз фойдаланишга қуйида кўрсатилган шартлар асосида берилади:

• давлат шериги билан келишилган лойиҳа ҳужжатлари асосида ДХШ объектида юқори синф ўқувчиларига бошланғич касб ҳунар тайёргарлигини таъминлашга мослашган махсус бино қисмини инобатга олган ҳолда, бино ва иншоотлар қуриш, шунингдек моддий-техник базасини замонавий стандартларга мос равишда ташкил этиш;
• битим амал қилиш муддати давомида ДХШ объектини асосий фаолият турини ўзгартирмаган ҳолда фойдаланиш;
• ДХШ объектида бино ва иншоотларни техник ва ёнғин хавфсизлиги қоидаларига мувофиқлаштирилган ҳолда қуриш ҳамда битим амал қилиш муддати давомида ушбу қоидалар асосида реконструкция ва эксплуатация қилиш;
• узоқ муддатга ДХШ объектини ривожлантириш режасини давлат шеригига тақдим этиш;
• нодавлат умумтаълим муассасасида бошланғич касб ҳунар тайёргарлик йўналиши бўйича тегишли микроҳудуддан камида 7 мактаб болаларини битим муддати тугагунга қадар беғараз равишда таълим олишини таъминлаш.