Ўзбек мумтоз адабиётининг йирик намояндаси, олим ва шоир, шоҳ ва саркарда Заҳириддин Муҳаммад Бобур таваллудининг 536 йиллиги муносабати билан адабий-маърифий тадбирлар ташкил этилмоқда, деб хабар берди ЎзА.
Андижон шаҳридаги Заҳириддин Муҳаммад Бобур номидаги боғда Андижон вилояти ҳокимлиги, Ўзбекистон Ёзувчилар уюшмаси, Заҳириддин Муҳаммад Бобур номидаги халқаро жамоат фонди ҳамкорлигида ташкил этилган тадбирда Ҳиндистон, Бангладеш, Қирғизистон давлатларидан ташриф буюрган меҳмонлар, мамлакатимизда ва хорижда фаолият олиб бораётган бобуршунос олимлар, профессор-ўқитувчилар, талабалар ва кенг жамоатчилик вакиллари иштирок этди.
Тадбирда сўзга чиққан вилоят ҳокими Шуҳрат Абдураҳмонов ва бошқалар Ўзбекистонда буюк аллома ва мутафаккирларнинг ижодий меросини ўрганиш, хотирасини абадийлаштириш, асарларида илгари сурилган эзгу ғояларни кенг тарғиб этишга алоҳида эътибор қаратилаётганини таъкидлади. Бобурнинг бетакрор шеърияти, Шарқ халқларининг турмуш тарзи, урф-одатлари, табиати ва қадриятлари ҳақида муфассал маълумот берувчи, инсонни комилликка ундовчи асарлари ёш авлодни Ватанга муҳаббат, истиқлол ғояларига садоқат руҳида тарбиялашда муҳим аҳамиятга эгалиги айтилди.
«Дарҳақиқат, Бобур ижоди инсонни комилликка етакловчи улкан маънавий меросдир. Айниқса, адабиёт, тарих, тилшунослик, ҳуқуқшунослик, мусиқа ва географияга оид асарлари бизга тарихимиз ҳақида жуда кўп маълумотлар бериш билан бирга, ўша давр ёзма манбааларини ўрганишимизда муҳим илмий асос бўлиб хизмат қилмоқда. Бобур лирикаси ўзбек мумтоз адабиётининг энг гўзал саҳифаларидан десак янгилишмаймиз», — дейилади хабарда.
Тадбирлар давом этмоқда.
Изоҳ (0)