Яманда икки бошли Сиам эгизаклари дунёга келди

Яманда икки бошли Сиам эгизаклари дунёга келди. Шифокорлар улардан фақат бири тирик қолиши мумкинлигидан ташвишланмоқда, деб ёзади Daily Mail.

Эгизаклар январь ойида мамлакат пойтахти, Сана шаҳрида дунёга келди. Абдул-Холид ва Абдул-Раҳим исмли эгизакларнинг танаси битта, бироқ боши иккита. Шифокорлар уларнинг ҳаётини сақлаб қолиш учун бор кучини сарфламоқда, бироқ уларнинг ота-онасига чақалоқларни хорижга олиб боришни тавсия қилмоқда.

Эгизакларнинг отаси 20 ёшли Акрам Али Аҳмед фарзандларини ажратишни истамаслигини маълум қилган. У, шунингдек, улардан бири яшаб кетиши учун иккинчисининг ўлимини қабул қилишга тайёр эмас. «Уларнинг ҳар иккаласи битта танада яшашини истайман. Аллоҳ менга берганига қарши бормайман», — деди у.

Шифохона педиатрия бўлими раҳбари Файзал ал-Бабли мазкур оилага даволаниш учун ҳукуматдан молиявий ёрдам олишга уринмоқда.