Самарқандда йўл ҳаракати хавфсизлиги ходимига пора таклиф қилган шахсга суд ҳукми ўқилди

2018 йилнинг 1 сентябрь куни Достон Актамов Самарқанд вилоят ИИБ ЙҲХБ 1-отряд маъмурий амалиёти йўналиши бўйича масъул ходими сафдор Фурқат Эргашевнинг хизмат хонасига келиб, Рахматилло Дўсяровга тегишли бўлган Nexia русумли автомашинани жарима майдончасидан чиқариб бериш эвазига унга қонунга хилоф равишда пора беришни таклиф қилган.

Фурқат Эргашевнинг билдиргиси асосида, 2018 йилнинг 1 сентябрь куни соат тахминан 15:00 атрофида Самарқанд вилоят ИИБ ва прокуратура ходимлари томонидан ўтказилган тезкор тадбир давомида Достон Актамов тегишли ҳужжатларсиз бошқарувида бўлган автомашинасини жарима майдончасидан чиқариш эвазига Фурқат Эргашевга бевосита пора тариқасида 300 000 минг сўм миқдоридаги пул маблағларини унинг хизмат хонасига тақдим қилган вақтида ашёвий далиллар билан ушланган.

Эслатиб ўтамиз, 2018 йилнинг август ойи охирларида пора берувчиларга қарши эълон қилинмаган жанг бошлангани, уларни тутиб берган ходимларга моддий манаъвий рағбатлантиришлар ваъда қилингани, бу иши уларнинг мансаб пиллапоясидан ўсишига ёрдам бериши ҳақида маълум қилинганди. Достон Актамов ҳам пора берувчиларга қарши кураш давомида қўлга олинган.

«Дарё» мухбири Фарҳод Норбўтаевнинг маълум қилишича, Жиноят ишлари бўйича Самарқанд шаҳар судида судья Ғайрат Негматов раислигида ўтган суд мажлисида мазкур жиноят иши атрофлича муҳокама қилиниб суд ҳукми чиқарилган. Суд ҳукмига кўра, Достон Актамов Ўзбекистон Жиноят Кодексининг 211-моддаси (Пора бериш) 1-қисми билан айбдор деб топилиб, унга нисбатан 3 йил муддатга озодликни чеклаш жазоси тайинланди.