Самарқандда автобусни орқага ҳайдаётганда одам уриб юборган ҳайдовчи 5 йилга озодликдан маҳрум этилди

Жиноят ишлари бўйича Самарқанд шаҳар судида судья Марат Эргашев раислигида автобусда одам уриб юбориб, пиёданинг ўлимига сабабчи бўлган ҳайдовчи Мансурбек Тойировга нисбатан жиноят ишни кўриб чиқилди. Бу ҳақда «Дарё» мухбири Фарҳод Норбўтаев хабар бермоқда.

2018 йилнинг 3 ноябрь куни соат тахминан 15:00 атрофида Қўшработ туманида яшовчи фуқаро Мансурбек Тойиров Isuzu транспорт воситасида Самарқанд шаҳар Ибн Сино кўчасидаги автобекатда автобусни орқага бошқариш вақтида унинг орқа томонидан йўлни кесиб ўтаётган пиёда 1954 йилда туғилган Ровза Акрамовани уриб юборади. Автобуснинг ўнг ғилдираклари остида қолган Ровза Акрамова бошидан олган тан жароҳати натижасида воқеа жойида вафот этган.

Суд ишида судланувчи, жабрланувчи ва гувоҳнинг кўрсатмалари атрофлича тингланди. Хусусан, судланувчи Мансурбек Тойиров ўз айбига тўлиқ иқрор бўлиб, марҳума Ровза Акрамова ётганлигини кўриб, унга ёрдам бермоқчи бўлиб воқеа жойига тез ёрдам чақиртирган. Бироқ Ровза Акрамова автоҳалокатдан сўнг воқеа жойида вафот этган.

Судланувчи Мансурбек Тойиров суд терговида айбига тўлиқ иқрорлик билдириб кўрсатув берди. Унинг айби суд мажлисида сўралган жабрланувчи ва гувоҳни кўрсатувлари билан тўлиқ ўз исботини топди.

Суд ҳукмига кўра, Мансурбек Тойиров Ўзбекистон Жиноят Кодексининг 266-моддаси 2-қисмида (Транспорт воситалари ҳаракати ёки улардан фойдаланиш хавфсизлиги қоидаларини бузиш одам ўлимига сабабчи бўлиши) назарда тутилган жиноятни содир этганликда айбли деб топилиб, у 3 йил муддатга транспорт воситаларини бошқариш ҳуқуқидан маҳрум қилиниб, 5 йил муддатга озодликдан маҳрум қилинди.