Ҳукумат қарори билан Ҳуснутдин Ҳасиловга «Ўзбекистон темир йўллари» акциядорлик жамияти бошқаруви раиси вазифасини бажариш юкланди. Бу ҳақда «Ҳуқуқий ахборот» канали маълум қилди.
Ҳуснутдин Ҳасилов шу пайтгача жамият бош менежери — бош муҳандис вазифасида ишлаб келаётганди.
Эслатиб ўтамиз, «Ўзбекистон темир йўллари» акциядорлик жамияти бошқаруви раиси Очилбой Раматов Бош вазирнинг биринчи ўринбосари — Транспорт вазири этиб тайинланган.
Президентнинг «Ўзбекистон Республикаси Ҳукумати ишини ташкил этишнинг сифат жиҳатидан янги тизимини жорий этиш тўғрисида»ги қарорига мувофиқ, Бош вазир, Бош вазир ўринбосарлари ва Бош вазир маслаҳатчилари томонидан хўжалик жамиятлари ва компаниялар, шунингдек, давлат улушига эга бўлган бошқа ташкилотлар фаолияти устидан бир вақтнинг ўзида раҳбарлик қилинишига йўл қўйилмайди.
Изоҳ (0)