Қўқон шаҳрида одамларнинг ҳаёти ва соғлиғи учун хавфли бўлган зўрлик ишлатиш билан қўрқитиб, ўзгаларнинг мулкини босқинчилик ва ўғирлик йўли билан талон-торож қилган жиноий гуруҳ қўлга олиниб, уларга нисбатан суд ҳукми чиқарилгани ҳақида хабар берилган эди.
ЎзАнинг ёзишича, собиқ ички ишлар ходими бош бўлган мазкур жиноий гуруҳ қотиллик жиноятини ҳам содир этган бўлиб, Жиноят ишлари бўйича Фарғона вилояти суди томонидан уларга ҳукм ўқилди.
Ҳар бир ота она фарзандининг бахтини, роҳатини кўришни истайди. Ички ишлар идораси ходими бўлиб ишлаётган Мадамин Олимов (исми фамилияси ўзгартирилган)нинг онасини нияту орзулари бир олам эди. Одамларнинг тинчлигию хавфсизлиги учун жавобгар бўлган профилактика инспекторининг ўзи эса «оила» деган муқаддас даргоҳни оддий ҳавасларга алмашди.
Суд ҳукмига кўра, Мадамин Олимов Қўқон шаҳар ИИБ ҲООБ профилактика нозири лавозимида ишлаб келган даврда Ш. Назарова билан танишиб, шаърий никоҳ асосида унинг хонадонида яшаб келиб, қиз фарзандли бўлиб, оила қуришга аҳдлашади.
Бироқ Мадаминнинг онаси унга уйланишига розилик бермаганлиги учун 2014 йил январь ойида онасининг тавсиясига кўра К.Г билан қонуний никоҳдан ўтиб, унга уйланади. Буни Мадамин Олимов Ш.Назаровадан яширишга ҳаракат қилган бўлишига қарамасдан у бундан хабар топиб, К.Гнинг иш жойига бориб у билан ўзаро жанжаллашган ва М. Олимов қонуний турмуш ўртоғи К. Г билан яшашни давом эттирса, унинг жиноий шериклари билан амалга оширган қонунга хилоф ишлари ва ахлоққа зид қилмишлари ҳақида маълумотларни ҳуқуқни муҳофаза қилувчи орган раҳбарларига топширишни билдирган. Шу билан топширмаслик эвазига 4 минг АҚШ доллари беришни талаб қилиб, уни қўрқитиб келган.
Шундан сўнг, Мадамин Олимов, укаси Ж.Олимов ва шериги А.Бакиматовлар билан бир гуруҳ бўлиб, муқаддам содир этган жиноятларининг фош этилишини олдини олиш учун Ш.Назаровани қасддан ўлдириш ҳаракатига тушади. Улар 2014 йил 25 апрель куни соат 00:18 ларда Ш.Назарованинг яшаш хонадони олдига келиб, уни машинага ўтқизади. Аёл қабиҳ ниятли бу кишиларнинг қўлида ўлим топди.
Шундан сўнг, олдиндан келишувга кўра, мазкур қотиллик жиноятини яшириш мақсадида унинг мурдасини қабристонга олиб келишиб, кўмиб юборишган.
Орадан йиллар ўтиб, уларнинг бошқа жиноятлари юзасидан олиб борилаётган тезкор тадбирлар давомида ушбу қотиллик жинояти ҳам фош этилди.
Жиноят ишлари Фарғона вилояти судининг ҳукми билан М. Олимовга аввалги жазони янги жазога қисман қўшилиб, узил-кесил ўташ учун 20 йил, Ж. Олимов ва А. Бакиматовларга эса 19 йил озодликдан маҳрум қилиш жазоси тайинланди.
«Мутасадди ташкилот ва ўзини ўзи бошқариш органлари томонидан оила жамиятнинг негизи экани, оила қуриш ва ўзаро келишув асосида қурилган оилаларнинг мустаҳкамлигини сақлаб қолиш, оиланинг муқаддас экани борасидаги тушунтириш ва тарғибот ишлари етарли даражада амалга оширилмаганлиги, оилалардаги аниқланган муаммо ва камчиликларга бефарқ қаралиши ва уларни бартараф қилиш чоралари кўрилмагани оқибатида мазкур қотиллик жинояти содир этилган. Аввало, ота-оналар янги оила қураётган фарзандларнинг келажаги ва ёш оилаларнинг бахти бардавом бўлиши йўлида бефарқ бўлмасликлари керак. Суд мазкур жиноятни сабабларини таҳлил қилиб, тегишли орган ва ўзини ўзи бошқариш органларига мазкур тоифадаги жиноятларни содир этилишини олдини олиш хусусида хусусий ажримлар чиқарди», – дейди Жиноят ишлари бўйича вилоят судининг судьяси Раҳматжон Арапов.
Изоҳ (0)