25 январь куни Самарқанд вилояти ҳокими Эркинжон Турдимов ҳеч қандай огоҳлантиришсиз Самарқанд шаҳридаги болалар-ўсмирлар футбол академиясига бориб, у ердаги ачинарли аҳволга гувоҳ бўлди, дея хабар бермоқда «Дарё» мухбири Фарҳод Норбўтаев.
Вилоят ҳокими мазкур муассаса фаолияти билан танишар экан, у ерда олиб борилаётган ишлар мутлақо қониқарсиз, деган тўхтамга келган.
54 нафар бола тарбияланаётган футбол академияси ҳудудида ободонлаштириш ишлари ўз ҳолига ташлаб қўйилган, бино атрофи қаровсиз. Жумладан, болалар машғулот ўтайдиган стадион ташландиқ бўлиб қолган. Болалар овқатланадиган ошхонанинг аҳволи ачинарли даражада. Бир ярим ойдан буён газ йўқлиги сабабли болалар ўз вақтида овқатланмайди. Ҳатто идиш товоқлар етишмайди.
Ҳожатхоналар 5 ойдан буён тозаланмаган, ётоқхонада ҳеч қандай шароит йўқ, санитария қоидаларига амал қилинмаган. Ўқувчилар дарс қилиши учун ҳеч қандай имконият йўқ. Машғулотларга олиб борадиган автобус носоз. Футбол академиясининг мутасаддилари фаолияти мутлақо қониқарсиз.
Эслатиб ўтамиз, Самарқанд вилояти ҳокими Эркинжон Турдимов Халқ билан бевосита мулоқот ўрнатиш, жойлардаги ҳақиқий аҳвол тўғрисида аниқ маълумот олиш мақсадида Telegram’да аккаунт ҳамда вилоят ҳокимлигида кун давомида ишлайдиган қисқа – 1177 рақамли «Ишонч телефони» ишга туширган.
Эркинжон Турдимовнинг «кутилмаган текширувлари»ни ижтимоий тармоқ фойдаланувчилари қўллаб-қувватламоқда ва ушбу чоралар Самарқанд вилоятида ҳам «тартиб ўрнатилиши»га ишонч билдирмоқда.
Ҳокимнинг ушбу иш услуби жойлардаги мутасаддилар фаолиятини ижобий томонга ўзгартиришга ёрдам берадими-йўқми яқин келажакда маълум бўлади.
Изоҳ (0)