Инновацион ривожланиш ва Қишлоқ хўжалиги вазирликлари Ҳиндистоннинг Maxараштра штатидаги гибрид ва генетик модификацияланган уруғларини ишлаб чиқариш, қайта ишлаш ва сотиш билан шуғулланувчи Nath Bio-Gens компанияси билан Андижонда ўзбек-ҳинд қўшма уруғчилик кластерини ташкил этишга келишди. Бу ҳақда «Дарё»га Инновацион ривожланиш вазирлиги матбуот хизмати маълум қилди.
Инновацион ривожланиш вазири Иброҳим Абдураҳмонов, Қишлоқ хўжалиги вазири ўринбосари Саидкомол Ходжаев ҳамда Nath Bio-Gens компанияси раҳбари Сатиш Кахливаз имзолаган ҳужжатга асосан, Ўзбекистонда уруғ етиштириш учун ер майдони ажратилиб, давлат-хусусий шерикчилик асосида уруғчилик кластери ўз фаолиятини бошлайди. Бунда уруғларни кўпайтириш ва тайёрлаш учун ҳиндистонлик мутахассисларга маҳаллий экин навларининг муртак плазмалари ва Ўзбекистонда яратилган экин навлари билан ишлаш имконияти берилади.
Nath Bio-Gens компанияси уруғ етиштиришдан то уларни сотишгача бўлган барча босқичларни ўз ичига олувчи замонавий тизимни яратиш учун тўғридан-тўғри инвестициялар киритади, шунингдек, уруғларни янги навларини тақдим этади, Ўзбекистон қишлоқ хўжалигида уруғларни тижоратлаштириш механизмлари бўйича амалий маслаҳатлари билан соҳани ривожлантиришга ҳисса қўшади.
Ҳиндистондан Ўзбекистонга пахта, буғдой, помидор, картошка, ерёнғоқ, ловия ва сабзавот экинлари бўйича уруғчилик соҳасидаги янги инновациялар олиб кирилади, бу йўналишдаги тижоратлашириш ишлари ҳам биргаликда амалга оширилади.
Яқин кунларда ҳинд мутахассислари Ўзбекистонга келиб, уруғчилик соҳасида амалга оширилаётган ишларни ўрганиб, баҳо беради, ҳамкорликка доир масалалар эса янада батафсил муҳокама этилади.
Изоҳ (0)