Инновацион ривожланиш вазирлиги Ўзбекиcтон ҳукумати делегацияси таркибида Ҳиндистонда бўлиб ўтган «Жўшқин Гужарат» халқаро инвестиция саммитида иштирок этди. Бу ҳақда «Дарё»га вазирлик матбуот хизмати маълум қилди.
Музокаралар натижасида Инновацион ривожланиш вазири И. Абдураҳмонов, Қишлоқ хўжалиги вазири ўринбосари С.Хўжаев, Андижон вилояти ҳокими Ш. Абдураҳмонов ҳамда Гужарат штатининг давлат корпорацияси — Gujarat Agro Industries Corporation раҳбари К. Рандхава агрокластер ташкил этишга келишиб олди.
Агрокластер кишлоқ хўжалиги экинлари ва балиқчилик маҳсулотларини етиштириш, ишлаб чиқариш, қайта ишлаш, етказиб бериш ва маркетинги билан шуғулланади. Агрокластер Андижон вилоятида 15-20 минг гектар ер майдонида тажриба тариқасида барпо этилиб, кейинчалик бошқа вилоятларга ҳам татбиқ этилиши кутилмоқда.
Гужарат пахта, ерёнғоқ, тамаки ва шакарқамиш етиштириш бўйича Ҳиндистонда етакчилик қилади, шунингдек, штатда буғдой, турли дуккакли ўсимликлар, маккажўхори плантациялари мавжуд. Бундан ташқари, Гужарат сут ва сарёғ, гўшт, тухум, ўсимлик ёғи ва шакар ишлаб чиқаришда илғорлиги билан ажралиб туради.
Инновацион ривожланиш вазири Иброҳим Абдураҳмонов Ҳайдарободнинг Геном водийсида фаолият юритадиган Bharat Biotech International компанияси раҳбари Венкатраман Сиварамакришнан билан Ўзбекистонга вакциналар ишлаб чиқариш технологияларини трансфер қилиш ҳамда юқори сифатли ва арзон вакциналарни ишлаб чиқариш бўйича узоқ муддатли ҳамкорлик қилишга келишди.
Ҳамкорликнинг биринчи босқичида компания ротовирусли диареянинг профилактикаси учун қўлланиладиган вакцинани ҳозирда Ўзбекистон харид қилаётган нархдан 50 фоиз арзонга етказиб беради. Сўнгра Ўзбекистонда ишлаб чиқаришни йўлга қўйиш учун хом ашё билан таъминлайди.
Кейинчалик эса тайёр маҳсулотни ишлаб чиқариш технологияси Ўзбекистонга тўлиқ трансфер қилинади. Бунда ўзбек-ҳинд давлат хусусий шериклиги ташкил этилиб, Ўзбекистон корхона фаолияти учун зарур ер, кўчмас мулк, ускуналар билан иштирок этса, ҳиндистонлик ҳамкорлар вакцина ишлаб чиқариш соҳасидаги энг сўнгги ноу-хаулар, замонавий технологияларни бепул тақдим этади. Техник экспертиза, ходимларни ўқитиш ҳамда ишлаб чиқаришнинг бошланғич босқичини мувофиқлаштиришни ўз зиммасига олади.
Изоҳ (0)