Владимир шаҳрида Ўзбекистонда ишлаб чиқарилган маҳсулотлар учун логистика маркази ишга тушади. Бу ҳақда Россиянинг Владимир вилояти губернаторининг Ўзбекистоннинг Россиядаги фавқулодда ва мухтор элчиси Ботир Асадов билан учрашуви чоғида баёнот берилди.
Учрашувда Владимир вилояти ва Ўзбекистон ўртасидаги ҳамкорликни кенгайтириш масалалари муҳокама қилинди. Томонлар ўзаро савдо-сотиқ ҳажмини, қўшма тадбирлар ва лойиҳалар сонини кўпайтиришга тайёрлигини билдирди.Икки мамлакат тадбиркорлари ўз имкониятлари ва келажак режалари ҳақида тақдимотлар ўтказди.Ўзбекистоннинг Россиядаги элчиси Б.Асадовнинг қайд этишича, Россия Ўзбекистоннинг энг йирик савдо шериги бўлиб қолмоқда. Ўзаро товарайрибошлаш ҳажми ўтган йили 21 фоизга ортиб, 6 миллиард АҚШ долларга етган. Владимир вилоятининг Ўзбекистон билан товар айрибошлаш ҳажми эса 2018 йилнинг 10 ойи мобайнида 24 миллион АҚШ доллардан ошган.Учрашувда Ўзбекистон корхоналари Владимир вилоятига замонавий енгил автомобиллар, тўқимачилик, тери ва оёқ кийим маҳсулотлари, электр ва механик асбоб-ускуналар, маиший техника ва бошқа товарларни етказиб бериши мумкинлиги таъкидланди.
Икки мамлакат ҳудудида Ўзбекистондан Россияга товарлар етказиб бериш, улгуржи савдо ва тақсимлаш марказларини ташкил этиш ҳақида ташаббус илгари сурилди. Бу маҳсулот етказишда вақт ва маблағларни тежаш, ўзаро савдо-сотиқ ҳажмини орттириш имконини беради. Зарур ҳужжатларни тайёрлаш бўйича ишлар бошлаб юборилди.
Изоҳ (0)