Миср Араб Республикасининг Ўзбекистондаги фавқулодда ва мухтор элчиси Амани Ал-Итр Фарғона вилоятида бўлиб, ҳудуднинг инвестицион ва туризм салоҳияти билан танишди. Элчи Фарғона вилояти ҳокими Шуҳрат Ғаниев билан учрашди. Бу ҳақда вилоят ҳокимлигининг матбуот хизмати «Дарё»га маълум қилди.
Учрашувда вилоятда савдо-иқтисодий, ҳуқуқий, маданий-гуманитар ва бошқа соҳаларда амалга оширилган лойиҳалар ва уларнинг самаралари, ушбу йўналишлардаги ҳамкорлик истиқболлари ҳақида сўз юритилди. Вилоятнинг инвестицион ва туризм соҳасидаги салоҳияти ҳақида маълумот берилди. Суҳбат чоғида томонларни қизиқтирган бошқа масалалар юзасидан ҳам фикр алмашилди.
«Биз Фарғона вилояти билан туризм, ёшлар, спорт, инвестиция, қишлоқ хўжалиги соҳаларида ҳамкорлик қилишни режалаштиряпмиз. Шунингдек, цитрус мевалар плантацияси яратиш, меҳмонхоналар қуриш, таълим ва илмий соҳаларда қўшма лойиҳалар ташкил этиш бўйича ҳам иш олиб борамиз», – деди Амани Ал-Итр хоним.
Учрашув сўнгида Шуҳрат Ғаниев элчига эсдалик совғаларини топширди.
Амани Ал-Итр бошчилигида делегация аъзолари Марғилон шаҳридаги ипакчилик мажмуаси, Риштон туманидаги кулолчилик устахоналари билан танишди.
Изоҳ (0)