Misr Arab Respublikasining O‘zbekistondagi favqulodda va muxtor elchisi Amani Al-Itr Farg‘ona viloyatida bo‘lib, hududning investitsion va turizm salohiyati bilan tanishdi. Elchi Farg‘ona viloyati hokimi Shuhrat G‘aniyev bilan uchrashdi. Bu haqda viloyat hokimligining matbuot xizmati “Daryo”ga ma’lum qildi.
Uchrashuvda viloyatda savdo-iqtisodiy, huquqiy, madaniy-gumanitar va boshqa sohalarda amalga oshirilgan loyihalar va ularning samaralari, ushbu yo‘nalishlardagi hamkorlik istiqbollari haqida so‘z yuritildi. Viloyatning investitsion va turizm sohasidagi salohiyati haqida ma’lumot berildi. Suhbat chog‘ida tomonlarni qiziqtirgan boshqa masalalar yuzasidan ham fikr almashildi.
“Biz Farg‘ona viloyati bilan turizm, yoshlar, sport, investitsiya, qishloq xo‘jaligi sohalarida hamkorlik qilishni rejalashtiryapmiz. Shuningdek, sitrus mevalar plantatsiyasi yaratish, mehmonxonalar qurish, ta’lim va ilmiy sohalarda qo‘shma loyihalar tashkil etish bo‘yicha ham ish olib boramiz”, – dedi Amani Al-Itr xonim.
Uchrashuv so‘ngida Shuhrat G‘aniyev elchiga esdalik sovg‘alarini topshirdi.
Amani Al-Itr boshchiligida delegatsiya a’zolari Marg‘ilon shahridagi ipakchilik majmuasi, Rishton tumanidagi kulolchilik ustaxonalari bilan tanishdi.
Izoh (0)