Самарқанд шаҳридаги «Самарқанд Ипак йўли» МЧЖ (маҳаллий тилда «Янги бозор» деб аталади) савдо мажмуасида тадбиркорлик фаолияти билан шуғулланувчи фуқаро исми сир қолишини сўраб «Дарё»га мурожаат қилди. Унинг айтишича, Самарқанд вилояти ҳокимининг иқтисодиёт ва тадбиркорлик масалалари бўйича биринчи ўринбосари Жамшид Ўроқов тадбиркор шахсий маблағлари эвазига қурган савдо дўконини бузиб ташлашга буйруқ берган.
— Иккинчи марта қурган савдо дўконимни бузишга топшириқ беришди. Дастлаб 2018 йилнинг 6 июль куни қурилиш ишлари бўйича Самарқанд шаҳар ҳокими ўринбосари Бобур Элмуродов келиб ҳеч қандай сабабсиз дўконимизни буздириб ташлади, — дейди тадбиркор. — Кейин яна харажат қилиб қурдим. Энди вилоят ҳокими ўринбосари Жамшид Ўроқов дўконимни бузишни буюрди. Президент раҳбарлардан тадбиркорларни қўллаб-қувватлаш, халқнинг дуосини олишни талаб қилмоқда. Ҳоким ўринбосари эса давлат раҳбари айтган гапларнинг тескарисини қилиб, тадбиркорлар фаолиятига тўсқинлик қилмоқда. Ҳоким ўринбосарининг бундай «ўзим хон, кўланкам майдон» қабилида иш тутиши Президент сиёсатига зид эмасми?
Тадбиркорнинг «Дарё»га маълум қилишича, дўконларни қуриш учун шаҳар ҳокимлигидан рухсат олган. «Дарё» мухбири Фарҳод Норбўтаев мазкур ҳолат бўйича журналистик суриштирув олиб бормоқда.
Эслатиб ўтамиз, Жамшид Ўроқов Самарқанд вилояти ҳокимининг иқтисодиёт ва тадбиркорлик масалалари бўйича биринчи ўринбосари лавозимига 4 кун аввал (2019 йил 13 январь куни) тайинланганди.
Маълумот учун, Самарқанд вилоятида тадбиркорлик субъектлари томонидан дуч келинаётган муаммолар ва турли тўсиқларни тезкорлик билан ҳал этиш ҳамда тадбиркорларни қўллаб-қувватлаш мақсадида «Жума – тадбиркорлар куни» деб эълон қилинган. Ҳал этилмаган ҳар қандай муаммоли масалалар бўйича вилоят ҳокими Эркинжон Турдимов жума кунлари учрашув ўтказади.
Изоҳ (0)