Чирчиқ дала ўқув майдонида Ватан ҳимоячилари куни муносабати билан тантанали ҳарбий парад бўлиб ўтди. Бу ҳақда Мудофаа вазирлиги матбуот хизмати «Дарё»га маълум қилди.
Унда Ўзбекистон мудофаа вазири генерал-лейтенант Абдусалом Азизов, Тошкент вилояти ҳокими, Тошкент ҳарбий округи қўшинлари қўмондонлиги ва шахсий таркиби, Қуролли Кучлар фахрийлари, кенг жамоатчилик вакиллари, ҳарбий хизматчиларнинг оила аъзолари, ўқувчи ёшлар ҳамда оммавий ахборот воситалари ходимлари иштирок этди.
Тантанали маросимда барча ҳарбий хизматчилар ва Ўзбекистон аҳолиси Ватан ҳимоячилари куни билан самимий муборакбод этилди.
Шундан сўнг, Тошкент ҳарбий округи қўшинлари ва ҳарбий техникалар тантанали марш билан ўтди. Қуруқликдаги ва ҳаводаги кучлар ўз қудратини намойиш этди.
Куннинг иккинчи ярмида Чирчиқ шаҳридаги «Кимёгарлар» маданият марказида бўлиб ўтган тантанали ва бадиий маросим аввалида мустақиллик йиллари хизмат вазифасини ўташ вақтида юксак жасорат, садоқат ва матонат намунасини кўрсатган ҳарбий хизматчилар хотирасига ҳурмат бажо келтирди. Шунингдек, 2018 йилнинг декабрь ойида ўтказилган Қуролли Кучлар миқёсидаги «Энг илғор мутахассис» кўрик-танлови ғолибларини мукофотлади.
Изоҳ (0)