Мудофаа вазири, генерал-майор Абдусалом Азизов «Халқ сўзи-онлайн» нашрига мамлакат мудофаа доктринаси янгилангани сабабларига изоҳ берди.
— 2018 йил 9 январда Президент Шавкат Мирзиёев «Ўзбекистон Республикасининг Мудофаа доктринаси тўғрисида»ги қонунни имзолаганди.
Маълумки, 1995 йил 30 августда Ўзбекистон Республикаси Ҳарбий доктринаси қабул қилинганди. 2003 йил 3 февралда эса мамлакат Мудофаа доктринаси муҳокама қилинди ва маъқулланди. Демак, шу пайтгача мудофаа соҳасидаги давлат сиёсати асослари, Қуролли Кучларнинг қурилиши, тайёргарлиги ва қўллашга оид асосий принциплар ҳамда йўналишларини тартибга солувчи 2 та доктринал ҳужжат қабул қилинганди.
Жаҳон ва минтақадаги вазият, юзага келаётган хатар ва таҳдидларга мос ҳолда доктринани қайта ишлаб чиқиш зарурати пайдо бўлди.
Глобаллашув давом этаётган ва халқаро муносабатларнинг тизими ўзгариб бораётган шароитларда жаҳондаги ҳарбий-сиёсий вазият халқаро ва минтақавий хавфсизликка хавф-хатар ҳамда таҳдидлар кўлами кенгайиб бораётганлиги — геосиёсий қарама-қаршиликнинг кучайиши, можаролар ва танг вазиятларни куч ишлатиб ҳал этишга бўлган ёндашувнинг устунлик қилиши, куч ишлатиш, шу жумладан, оммавий қирғин қуролини қўллаш эҳтимоли ошганлиги, ҳарбийлаштириш, халқаро терроризм ва экстремизм фаоллашганлиги, ахборот макони ва кибермаконда ўзаро кураш кучайганлиги билан тавсифланади.
Шуни ҳам унутмаслик керакки, минтақадаги вазиятга халқаро терроризм, наркотрафик ва трансчегаравий жиноятлар соя солиб турибди.
Қолаверса, мамлакат мудофаа салоҳиятини мустаҳкамлаш, ташқи сиёсатнинг мослашувчанлик ва очиқлиги, энг асосийси, қўшни давлатлар билан дўстона ва амалий муносабатларнинг ривожланаётгани каби муҳим омилларга, суверенитет ва ҳудудий яхлитликни таъминлашдек устувор вазифаларга таянган ҳолда, мамлакат Мудофаа доктринаси сифат жиҳатидан янгиланди. Шуни алоҳида таъкидлаш жоизки, доктрина биринчи марта тўлиқ очиқ эълон қилинди. Бу эса Ўзбекистон мудофаа сиёсати очиқлигининг тасдиғидир.
Изоҳ (0)