Террорчиликни молиялаштиришда ва терактларни тайёрлашда айбланаётган беш нафар Ўзбекистон ва бир нафар Қирғизистон фуқароси устидан суд Швецияда 7 январь, душанба куни бошланади, деб хабар беради «Podrobno.uz».
Айбланувчилар Акрамжон Эргашев, Давид Идриссон, Шоаҳмад Маҳмудов, Ғулом Тожиев ва Бахтиёр Умаров Ўзбекистон, Отабек Абдуллаев эса Қирғизистон фуқароларидир.
Абдуллаев, Эргашев, Идриссон ва Умаров 2018 йил майидан, Тожиев — октябрдан буён ҳибсда сақланмоқда. Маҳмудов 2018 йил сентябрида қўлга олинган, кейинроқ суд уни ҳибсдан озод қилди.
Акрамжон Эргашев ИШИД вакилларига йўналтирилгани тахмин этилаётган пул ўтказмаларида айбланмоқда. Идриссон, Маҳмудов ва Абдуллаев ҳам террорчиларга пул ўтказишда ва Швецияда терактлар тайёрлашда гумон қилинмоқда. Бунинг учун улар юзлаб литр ва килограм кальций гипохлорити, водород пероксиди, калий гидроксиди ва олтингугурт кислотасини сотиб олган. Шунингдек, улар тўртта рация, газниқоб, тиззабанд, махсус қўлқоп ва бошқа ускуналарни ҳам харид қилган.
Тергов маълумотларига кўра, Идриссон, шунингдек, 49 грамм гашишни ноқонуний сақлашда ҳам айбланмоқда. Абдуллаев банкда ҳисобварақ очишда қалбаки ҳужжатлардан фойдаланган. Умаров пул ўтказмаларини амалга оширишда сохта Греция паспортини кўрсатган.
Суд иши февралда якунланиши керак.
Изоҳ (0)