Бугун, 3 январь куни Ўзбекистон Республикасининг Президенти Шавкат Мирзиёев Шанхай ҳамкорлик ташкилотининг Бош котиби Владимир Норовни қабул қилди. У жорий йилнинг 1 январида мазкур лавозимга киришган эди, деб ёзади Ўзбекистон Республикаси Президентининг матбуот хизмати.
Давлат раҳбари Ўзбекистон Республикаси вакилининг ШҲТ Бош котиби лавозими каби юқори ва масъулиятли лавозимга тасдиқланиши тарихий ҳодиса эканлигини таъкидлади.
Учрашув давомида Ўзбекистон Президенти ШҲТнинг фаолиятига юқори баҳо берди.
Ўзаро ҳамкорликнинг келажакдаги устувор вазифалари сифатида хавфсизликни таъминлаш, савдо, иқтисодиёт, инвестициялар, транспорт коммуникациялари, туризм, қишлоқ хўжалиги ва минтақалараро ҳамкорлик соҳаларидаги ҳамкорликни ривожлантириш каби йўналишлар санаб ўтилди.
Учрашув якунида давлат раҳбари Владимир Норовга ШҲТ Бош котиби масъулиятли лавозимидаги самарали фаолиятига муваффақиятлар тилади.
Изоҳ (0)