Ўзбекистонда 2018 йилда 13 та янги масжид очилди, 39 таси янгидан қурилди

Ўзбекистон мусулмонлари идораси 2018 йил сарҳисобини эълон қилди.

«Муҳтарам Президентимиз раҳнамоликларида Қуръон мусобақалари билан бошланган 2018 йил қут-баракали ўтди, Аллоҳ таолонинг неъматлари бисёр бўлди», — дейилади хабарда. Ўтган йилда амалга оширилган ишлар сифатида қуйидагилар санаб ўтилган:

– Халқаро ислом академияси таъсис этилди;

– Халқаро Ислом цивилизация маркази ташкил этилди;

– «Вақф» хайрия жамоат фонди тузилди;

– Ҳадис илми мактаби номли олий диний таълим муассаси иш бошлади;

– масжид-мадрасаларни давлат рўйхатидан ўтказишда бир қатор имтиёз ва енгилликлар берилди;

– 13 та янги масжид очилди, 39 таси янгидан қурилди, 100 га яқини капитал таъмирланди;

– Ҳаж қилувчилар сони 7200 дан ошди, умра сафарига чекланмаган миқдорда зиёратчилар бориши мумкин бўлди;

– Рамазон ойида 1149 та масжидда хатми Қуръон ўтказилди;

– «Қуръони карим ва тажвид» ҳамда «Араб тили» курслари ташкил этилди, бундан элу халқимиз жуда ҳам мамнун бўлди.

Диний соҳада амалга оширилаётган саъй-ҳаракатларни бутун дунё ҳамжамияти эътироф этмоқда. АҚШ Давлат департаменти Ўзбекистонда диний эркинлик йўлидаги ишларни тан олди. БМТ сессиясида Ўзбекистон ташаббуси билан «Маърифат ва диний бағрикенглик» номли муҳим ҳужжат қабул қилинди.

Ўзбекистон уламолари халқаро анжуманларда муносиб иштирок этди. Саудия Арабистони, Франция, Испания, Россия, Туркия ва бошқа кўплаб давлатлар мезбонлик қилган нуфузли халқаро тадбирларда вакилларимиз муваффақиятли қатнашди.

Ислом олами билан алоқалар мустаҳкамланиб, мусулмон дунёсининг энг мўътабар уламолари мамлакатга ташриф буюришди. Азҳари шариф шайхи Аҳмад Тоййиб, йирик муҳаддис Муҳаммад Аввома ва тариқат пешвоси Зулфиқор Аҳмад Нақшбандий каби зотларнинг ташрифи ўзгача файз бахш этди.