Миллий гвардия Сурхондарё вилояти бўлинмаси Термиз шаҳридаги шифохоналарда даволанаётган кекса авлод вакиллари, ижтимоий ҳимояга муҳтож беморлар ҳамда эҳтиёжманд оилалар фарзандлари холидан хабар олиб, уларни Янги йил байрами билан табриклади. Бу ҳақда ЎзА хабар берди.
Қуролли Кучлари ташкил этилганининг 27 йиллиги ҳамда Ватан ҳимоячилари куни муносабати билан эълон қилинган Ватанпарварлик ойлиги доирасида ўтказилган тадбир иштирокчилари меҳнат фахрийлари ва эҳтиёжманд беморларга дори-дармон улашди.
— Байрамлар арафасида эҳтиёжманд оилалар, беморлар ва ёши улуғ инсонлар ҳолидан хабар олиб, уларни қўллаб-қувватлаш юксак фазилат, — дейди вилоят кўп тармоқли тиббиёт маркази бош шифокори ўринбосари Турдиали Абдураҳмонов. — Бундай эзгу ишлар беморларнинг тезроқ оёққа туриб кетишига далда бўлади. Ҳарбийларнинг Янги йил олдидан шифохонамизга келгани ҳам кекса авлод вакиллари ва эҳтиёжманд беморларнинг руҳини кўтарди.
Янги йил болажонларга қувонч улашадиган севимли байрам. Шу куни Миллий гвардия ходимларининг кутилмаганда вилоят болалар кўп тармоқли тиббиёт марказига келгани бу ерда даволанаётган ўғил-қизлар учун ўзгача кайфият улашди. Ҳарбийлар қўлидан совға-саломни олган бемор болалар юзида беғубор табассум пайдо бўлди.
Изоҳ (0)