«Ўзбекнефтегаз» АЖ «Ангрен» эркин иқтисодий зонасида Жанубий Корея билан ҳамкорликда кўчма автомобилларга газ тўлдириш станцияларини ишлаб чиқариш ва хизмат кўрсатиш лойиҳасини ишга туширди. Бу ҳақда жамият матбуот хизмати хабар бермоқда.
2017 йилда «Ўзбекнефтегаз» ва NK MOBILE томонидан ташкил этилган қўшма корхонада мазкур цех ишга туширилгунга қадар ушбу қурилма Тошкент вилоятининг Пискент туманида синаб кўрилди ва ўзини самарасини кўрсатди.
Қайд этиш жоизки, қурилма нафақат транспор ва қишлоқ хўжалиги соҳасида, балки аҳолининг табиий газга бўлган эҳтиёжини қондиришда ҳам кор келиши мумкин. Мутахассислар ҳисоб-китоб китобига кўра, иссиқ кунларда бир, совуқ тушганда эса иккита кўчма газ тўлдириш станцияси бир ой давомида 30 дан ортиқ хўжаликка хизмат кўрсатади. Бу олис қишлоқ ҳудудларига табиий газ тармоғи тортиш ёки мунтазам автомобилларга газ тўлдириш станциялари қуришдан кўра арзонроқ тушади.
Биринчи босқичда цехда 40 тагача кўчма автомобилларга газ тўлдириш станцияси йиғилиши кўзда тутилмоқда. Келгусида томонлар юқори босимли газ баллонлари ишлаб чиқарадиган заводни ҳам фойдаланишга топширишни режалаштирган.
Маълумот учун, бугунги кунда Ўзбекистонда 700 та автомобилларга газ тўлдириш станцияси ишлаб турибди. Келгуси икки йил давомида яна 178 та шундай станция очилиши кўзда тутилган.
Изоҳ (0)