Вилоят болалар кўп тармоқли тиббиёт марказида туркияликлик шифокорлар ўзбекистонлик ҳамкасблари билан 6 яшар Баҳодир Исроилжоновнинг юраги атрофида йиғилган суюқликни чиқариб, дренаж ўрнатди. 15 кунлик Имона Иброҳимжонованинг меъёридан ортиқ ураётган юраги эса одатий маромга туширилди. Бу ҳақда «Дарё»га вилоят соғлиқни сақлаш бошқармаси матбуот хизмати маълум қилди.
Туркия ҳамкорлик ва мувофиқлаштириш агентлиги — TIKA ташаббуси билан Наманганда ўтказилган анжуман давомида шундай юқори технологик операциялар бажарилди. «Шошилинч ҳолатларда болалар ҳаётини сақлаб қолиш» дастури доирасидаги машғулотларда туркиялик жарроҳ ва кардиологлар Салим Беличи, Иброҳим Энче, Юнус Эмре, Умид Dogan ва Али Гунеш наманганлик шифокорларга сабоқ берди. Уларда вилоятдаги даволаш-профилактика муассасалари ва тиббиёт бирлашмаларида фаолият олиб бораётган 60 нафардан ортиқ болалар жарроҳи, педиатр ва анестезиологлар иштирок этди.
Анжуманда шошилинч ёрдам, нафас етишмовчилиги ва шок ҳолатларида ҳаво йўлини очиш, юрак тўхташини даволаш, ритм бузилишларида ёрдам кўрсатиш, жароҳат ҳолатларида реанимация ҳамда умуртқанификсациялаш, бемор болани реанимациядан чиқариш каби бир қатор мавзуларда маъруза қилинди. Савол-жавоблар чоғида тингловчиларни қизиқтирган усул ва услублар ҳақида батафсил тушунча берилди.
—Машғулотларда хорижлик мутахассислардан кўп нарсаларни ўргандик. Жаҳон тиббиётида жорий этилган қатор янгиликлардан воқиф бўлдик. Қалтис вазиятларда болалар ҳаётини асраб қолиш бўйича малакамизниянада оширдик, — дейди вилоят болалар кўп тармоқли тиббиёт маркази неонатолог-врачи Дилбар Азизова.
Анжуман дастуридаги «Маҳорат дарслари» қатнашчиларда қизиқиш уйғотди. Машғулотлар якунида тингловчиларга агентликнинг сертификатлари топширилди.
—Давлатлар ўртасидаги ҳамкорликнинг ривожига муносиб ҳиссамиз қўшилаётганлигидан мамнунмиз, — дейди TIKA агентлигининг Ўзбекистондаги ваколатхонаси раҳбариАли Ихсан Чоғлар. — Жорий йилда ўзбек шифокорларини ўқитиш,соҳа моддий-техник имкониятларини яхшилаш, бемор болаларни чет элда даволатиш борасида изчил иш олиб борилди. Келгусида ҳам тиббиёт соҳаси ходимлари касбий маҳоратини ошириш бўйича янги лойиҳаларни режалаштиряпмиз.
Анжуман давомида TIKA агентлиги томонидан Наманган шаҳар тез тиббий ёрдам бўлимига беғараз берилган 4 та замонавий Toyota реанимобили тақдимоти ҳам ўтказилди. Мазкур тез ёрдам машиналари энг сўнгги русумдаги тиббий асбоб-ускуна ва қурилмалар билан жиҳозланган бўлиб, оғир касалликни бошидан кечираётган беморга шу жойнинг ўзида ёрдам кўрсатиш ва хавфсиз шифохонага етказишга ихтисослаштирилган.
Изоҳ (0)