Bosch компанияси автомобилга калитсиз кириш тизимини янги даражага етказишни режалаштирмоқда, деб ёзади Spot. Компания анъанавий равишда январь ойи бошида Лас-Вегасда бўлиб ўтган CES-2019 халқаро кўргазмасида иштирок этади ва унда Perfectly Keyless тизимини тақдим этади.
Bosch томонидан тавсия этилган тизим смартфон ва махсус дастурдан фойдаланишни талаб қилади.
Perfectly Keyless махсус ишлаб чиқилган мобил иловадан фойдаланиб, рақамли калитни тўғридан-тўғри смартфонда сақлайди. Ҳайдовчи автомобилига яқинлашганда, рақамли калитларни бошқариш дастури смартфондан булутли сервер орқали автомобилга ўрнатилган сенсорларга сигнал узатади. Агар сенсорлар рақамли калитни аниқласа, тизим рақамли эшик қулфини бошқариш блокига сигнални юбориб, уларни очади.
Энг қулай жиҳати шундаки, ҳайдовчи телефонни олиши ва автомобилнинг маълум бир қисмига уни қулфни очиш учун йўналтириши керак бўлмайди. Ахборот булут орқали узатилгани сабабли, сенсорлар смартфондаги рақамли калитни смартфон ҳатто чўнтак ёки сумка ичида бўлганда ҳам ҳисоблайди.
Бу функция туфайли NFS’га асосланган Perfectly Keyless бошқа дастурлардан ажралиб туради. Digital Trends портали таъкидлашича, Perfectly Keyless Tesla Model 3 электрмобилларида қўлланиладиган калитсиз кириш тизимига ўхшайди.
Изоҳ (0)